Meclisa Jinan a Malbatên Şehîdan a kantona Cizîrê ya Bakur û Rojhilatê Sûriyê, bi dirûşma “Jin, Jiyan, Azadî” civîna xwe ya salane li dar xist. Encam, biryar û pêşniyarên di civînê de derketine dê ji bo konferansa Meclîsa Jin a Malbatên Şehîdan a Bakur û Rojhilatê Sûriyê re bên pêşkêşkirin.
Di hola civînê de wêneyên Rêber Abdullah Ocalan, şehîd Sakîne Cansiz, Şîlan Kobanê, Bêrîtan, Viyan Soran, Leyla Wan, Salîha Erebo hatin daliqandin.
Civîn ji aliyê Rêvebera Meclîsa Jinan a Malbatên Şehîan a Kantona Cizîrê Meryem Mihemed, Rêvebera Meclîsa Jinan a Malbatên Şehîdan a Bakur û Rojhilatê Sûriyê Cewahir Osman, Hevseroka Desteya Meclîsa Malbatên Şehîdan a Kantonê Yusra Mihemed Sedo ve hat birêvebirin. Di destpêkê de Cewahir Osman birêxhatina beşdarvanan kir.
Piştî deqeyek rêzgirtina ji bo giyanê şehîdan, Meryem Mihemed rewşa siyasî nirxand.
Meryem Mihemed diyar kir ku sala 2025’an salek tijî berxwedan bû û wiha got: “Dewleta Tirk digot em ê sala 2025’an Kurdan tune bikin. Rêbert Apo jî sala 2025’an kir sala fînala çareserî û sala demokrasiyê. Niha dema em lê dinêrin diyar e ku kîjan xet ser ketiye. Plana dewleta Tirk a qirkirina Kurdan bi ser neket. Ev jî ji encama berxwedana me, berxwedana Bendava Tişrînê ye. Gelê me di rewşek tund de li ber xwe da. Vê jî destê Rêber Apo bihêz kir. Dê ev berxwedan bidome heta em azadiya fîzîkî ya Rêber Apo çêbikin. Rêber Apo pêvajoyek da destpêkirin, ji bo em bibin bersiva vê pêvajoyê jî pêwîst e lêhûrbûnek xurt bê kirin û di her alî de amedekarî bên kirin.”
Di civînê de dirûşmên “Bijî Serok Apo”, “Jin, Jiyan, Azadî” û “Bê Serok Jiyan Nabe” hatin berzkirin.
Piştî nirxandinên siyasî rapora salane ya kar û xebatan hat xwendin. Piştî xwendina raporê civîn ji ragihandinê re girtî berdewam kir.
Dê di civînê de rewşa rêxistinî bê nirxandin, pêşniyar, nêrîn, rexne bên girtin. Kêmaniyên derketine bên nirxandin. Pêşniyarên ji civînên bajaran derketine dê bên nirxandin. Encam, biryar û pêşniyarên di civînê de derketine dê ji bo konferansa Meclîsa Jinan a Malbatên Şehîdan a Bakur û Rojhilatê Sûriyê re bên pêşkêşkirin.
Konferans dê di demê pêş de pêk bê, lê hîna dem û cihê konferansê nehatiye diyarkirin.
