Artêşa Îsraîlê li gelek deverên Şerîda Xezayê êriş pêk anîn û di encamê de 7 kes hatin kuştin.
Her wiha Ajansa Alîkariyê UNRWA derbarê êrişên Îsraîlê de raporek parve kir.
UNRWA dibêje di n
avbera 11-16’ê Îlonê de, li Xezayê 12 tesîsên UNRWA’yê, rasterast an nerasterast hatin lêdan.
Artêşa Îsraîlê li gelek deverên Şerîda Xezayê êriş pêk anîn û di encamê de 7 Filistînî jiyana xwe ji dest dan.
Li gorî çavkaniyên nexweşxaneyê di êrişên Îsraîlê de dîsa sivîl, konên koçberan, wesayît û avahî bûn armanc.
Di êrişa hewayî ya artêşa Îsraîlê de ku li navenda bajarê Xezayê avahiyek kir armanc, 4 kes hatin kuştin gelek kes jî birîndar bûn.
Li Kampa Penaberan a Şatiyê, di êrişa bombeyî ya Îsraîlê de li ser malekê, 3 kes hatin kuştin.
Di heman kampê de, di êrişa hewayî ya li ser maleke din de, gelek Filistînî birîndar bûn û hin jî di bin kavilan de man.
Artêşa Îsraîlê dema ku li Kampa Penaberan a Şatiyê êrişên hewayî pêk anî, di heman demê de ji bejahî û deryayê ve jî herêmên bakur bombebaran kir.
Artêşa Îsraîlê li derdora Zanîngeha Vekirî ya Qudsê ya li rojavayê bajarê Xezayê êrişên giran pêk anîn.
Li Taxên Tel el-Hava û Sabrayê yên li başûrê bajêr, bi dronên Îsraîlê yên bi teqemenî barkirî êriş li ser avahî û tesîsan hatin kirin û di encamê de wêraniyeke mezin çêbû.
Her wiha, yekîneyên topên Îsraîlê rojhilatê Kampa Penaberan a Megazî û navenda bajarê Xan Yunusê bombebaran kirin.
Unrwa: Li Xezayê 12 tesîsên ku zêdetirî 11 hezar kes lê diman bûn armanc
Ajansa Alîkariyê ya Neteweyên Yekbûyî ji bo Penaberên Filistînî li Rojhilata Nêzîk-UNRWA derbarê êrişên Îsraîlê de raporek parve kir.
Di raporê de hate gotin:
“Di navbera 11-16’ê Îlonê de, li bajarê Xezayê 12 tesîsên UNRWA’yê, ku zêdetirî 11 hezar kes lê diman, 9 ji wan dibistan û 2 jî navendên tenduristiyê, rasterast an nerasterast hatin lêdan, herî kêm 5 koçber birîndar bûn.”
Di êrişên hewayî û bejahî yên Îsraîlê de, ofîsa UNRWA’yê ya li Xezayê jî zirar dît.
Di raporê de hate destnîşankirin ku ji ber wêranbûna mezin a binesaziyê ya ku Îsraîlê li Xezayê çêkiriye û astengkirina alîkariya mirovî, gihîştina Filistîniyên li bajêr ji bo çavkaniyên jiyanî bi awayekî giran zehmet bûye.
Di Şerîda Xezayê de ji 7’ê Cotmeha 2023’yan ve herî kêm 543 xebatkarên alîkariyê hatine kuştin, ji van 304 xebatkarên UNRWA’yê û 66 jî xebatkarên ku piştgirî dane xebatên UNRWA’yê ne.
Di raporê de hate ragihandin ku UNRWA xebatên xwe didomîne û zêdetirî 80 hezar koçberên Filistînî li 73 stargehên UNRWA’yê dimînin.
Di raporê de bal hate kişandin ku artêşa Îsraîlê ji sedî 82’ya Xezayê kiriye herêma leşkerî û herî kêm 197 tesîsên UNRWA’yê, ku nîvê tesîsên wê ne, di herêmên ku Îsraîlê weke herêma leşkerî an jî hişyariya koçberiyê daye, mane.
