Lîderê olî yê Îranê Ayetullah ElÎ Xamaney doh ragihand ku welatê wî dê bi Amerîkayê re danûstandinên rasterast li ser bernameya nukleerî neke.
Xamaney, danûstandinên bi Amerîkayê re wek “rêya bêçare” binav kir.
Almanya jî ragihand ku heta cezayên nû ji bo Îranê bikevin meriyetê wê “hewlên dîplomatîk” berdewam bikin.
Lîderê olî yê Îranê Ayetullah ElÎ Xamaney doh ragihand ku welatê wî dê bi Amerîkayê re danûstandinên rasterast li ser bernameya nukleerî neke.
Ev yek hewldanên dawî yên Neteweyên Yekbûyî ji bo astengkirina vegerandina cezayên li ser Tehranê bi piranî pûç kir.
Gotinên Xamaney ên ku di televîzyona dewletê ya Îranê de hatin weşandin, derfeta Serokomarê Îranê Mesud Pezeşkiyan, ku li Civîna Giştî ya Neteweyên Yekbûyî li New Yorkê ye, ji bo vekirina rê li ber Amerîkayê zehmet dike.
Ji aliyê din ve, Wezîrê Karên Derve yê Îranê Abbas Arakçî, beriya ku cezayên roja Yekşemê bikevin meriyetê, li New Yorkê bi dîplomatên ji Fransa, Almanya û Îngilistanê re çend hevdîtin pêk anî.
Xameney: Danûstandinên bi Amerîkayê re rêya bêçare ye
Xamaney, danûstandinên bi Amerîkayê re wek “rêya bêçare” binav kir û got:
“Waşîngton encamê berê diyar kiriye: Rawestandina çalakiyên nukleerî û dewlemendkirina uranyûmê. Ev ne danûstandin e, ev zordarî ye.”
Wezareta Karên Derve ya Almanyayê, piştî hevdîtina bi Arakçî re, di peyamekê de li ser X’ê ragihand ku Parîs, Berlîn, London û Yekîtiya Ewropayê bang li Îranê kirine ku “di nav çend rojan de” gavên ji bo çareserkirina fikarên li ser bernameya nukleerî bavêje.
Di daxuyaniya wezaretê de hate gotin ku divê Îran bi Amerîkayê re vegere danûstandinên rasterast û destûrê bide Ajansa Navneteweyî ya Enerjiya Atomê (UAEA) ku bigihîje hemû sazgehên nukleerî.
Sê welatên Ewropayê, ku wek E3 têne nasîn, ji ber ku Tehran li gorî şertên peymana nukleerî ya sala 2015’an tevnagere, mekanîzmaya “snapback” çalak kirin.
Ev mekanîzma di sala 2015’an de di peymana nukleerî ya di navbera Îran û hêzên cîhanê de hatibû zêdekirin.
Bi awayekî ku li Neteweyên Yekbûyî neyê redkirin hatibû çêkirin.
Di dema destpêkirina vê pêvajoyê de, ger welatên Rojava û Îran di nav 30 rojan de li hev nekiribin, tê payîn ku cezayên li ser Îranê dîsa bikevin meriyetê.
Almanya: Heta cezayên nû bikevin meriyetê wê hewlên dîplomatîk bidomin
Wezareta Karên Derve ya Almanyayê ragihand ku heta cezayên nû bikevin meriyetê jî “hewlên dîplomatîk” dê berdewam bikin.
Beriya vê, Wezîrê Karên Derve yê Almanyayê Johann Wadephul, beriya daxuyaniyên Xamaney, gotibû ku îxtîmala gihîştina lihevhatinekê bi Îranê re heta dawiya hefteyê “pir kêm” e.
Di nav vê trafîka dîplomatîk a giran de, Araqçî roja Duşemê li New Yorkê bi Rêveberê Giştî yê Ajansa Navneteweyî ya Enerjiya Atomê Rafael Grossi re jî hevdîtin pêk anî.
Di destpêka vê mehê de, saziya çavdêriya nukleerî ya Neteweyên Yekbûyî û Îranê bi navbeynkariya Misrê peymanek îmze kirin ku rê li ber ji nû ve destpêkirina hevkariyê vekir.
Lê belê ev peyman hîn bi temamî nehatiye cîbicîkirin.
