Trump li ser binpêkirina qada hewayî ya Rûsyayê dibêje divê welatên endamên NATO’yê balafirên Rûsî yên ku ketine qada wan a hewayî bixin xwarê.
Her wiha Trump got bi piştgiriya darayî ya NATO’yê û Ewropayê, vegerandina Ukraynayê bo sînorên wê yên destpêkê gengaze.
Serokê Amerikayê Donald Trump, di Civata Giştî ya Neteweyên Yekbûyî de, di hevdîtina xwe ya bi Zelenskiy re, bersiva rojnamevanan da.
Trump, got ku divê welatên endamên NATO’yê balafirên Rûsî yên ku ketine qada wan a hewayî bixin xwarê.
Lê belê Trump, li hember binpêkirinên qada hewayî yên ku tê îdiakirin ji aliyê Rûsyayê ve hatine kirin, derbarê bersiveke muhtemel a NATO’yê de ti hûrgilî neda û soz neda ku Amerîka wê beşdarî çalakiyeke wisa bibe.
Daxuyaniyên Trump piştî wê yekê hatin ku roja Înê ya borî sê balafirên şer ên Rûsî bê destûr ketin qada hewayî ya Estonyayê.
Ev bûyer, piştî hefteyekê ku herî kêm 19 balafirên bê mirov ên Rûsî qada hewayî ya Polonyayê binpê kiribûn, qewimî.
Şeva Duşemê, balafirgehên Kopenhag û Osloyê ji ber balafirên bê mirov ji bo demeke kurt hatin girtin.
Dema lêkolînên derbarê van binpêkirinan de berdewam dikin, Serokwezîra Danîmarkayê Mette Frederiksen got:
“Em nikarin rola Rûsyayê di van bûyeran de paşguh bikin.”
Trump: Ukrayna dikare erdên xwe vegerîne
Her wiha piştî axaftina xwe ya di Civata Giştî de, Trump ji Zelenskiy re got, “Em hurmeteke mezin didin têkoşîna Ukraynayê.”
Trump, paşê di peyamekê de ku li ser Truth Socialê parve kir, wiha nivîsî:
“Piştî ku min rewşa wan a leşkerî û aborî bi temamî nas kir, ez niha bawer im ku Ukrayna dikare hemû erdên xwe vegerîne.
Bi taybetî bi piştgiriya darayî ya NATO’yê û Ewropayê, vegerandina Ukraynayê bo sînorên wê yên destpêkê pir mimkun e.”
Ev yek, cara yekem bû ku Trump eşkere got ku Ukrayna dikare hemû erdên xwe yên wendabûyî vegerîne û hêza leşkerî ya Rûsyayê bi awayekî vekirî pirsyar kir.
Di berdewamiya peyama xwe de Trump ev tişt got:
“Rûsya sê sal û nîv e şerekî bêencam dimeşîne. Lê belê hêzeke leşkerî ya rastîn dê ev şer di nav hefteyekê de bi dawî bikira.”
