Endama Konseya Rêveber a KJK’ê Çîgdem Dogû behsa pêvajoya Aştî û Civaka Demokratîk ya rêber Apo kir.
Çîgdem Dogû vekişîna gerîla ji Bakurê Kurdistanê û Tirkiyê weke gaveke dîrokî pênase kir û got:
”Pêvajo ne pêvajoyeke bazariyê ye, meseleya aştî û demokratîkbûnê ya rasteqîn e”.
Çîgdem Dogû bang li komîsyona li meclîsê kir ku li Rêber Apo guhdarî bike, qanûnên entegrasyona demokratîk bêne derxistin û pêvajoya destûra bingehîn bê destpêkirin.
Endama Konseya Rêveber a KJK’ê Çîgdem Dogû tevlî bernameya taybet a televîzyona Medya Haber TV bû û pêvajoya ku bi Banga Aştî û Civaka Demokratîk a Rêber Apo destpê kir, nirxand.
Çîgdem Dogû got, di demekê de ku pirsa ‘Gelo pêvajo xitimî ye?’ dihate kirin, pêngava vekişîna gerîla ji Bakurê Kurdistanê û Tirkiyê gaveke dîrokî ye û wiha anî ziman:
”Ji bo çareseriya pirsgirêka Kurd pêwîstî bi perspektîfeke kûr heye”
Ji bo çareseriya pirsgirêka dîrokî ya Kurd pêwîstî bi perspektîfeke kûr heye.
Pêvajo ne pêvajoyeke dan û standinê ye, ne meseleyeke bazariyê ye, lê meseleyeke aştiyeke rastîn e, meseleyeke demokratîkbûnê ya rasteqîn e.
Rêber Apo bi vê pêvajoyê re hewl dide têgeh û hebûneke nû ya ‘Em’ biafirîne û anî ziman ku di serî de gelê Kurd hemû gel bi parastina cihêrengî, hişmendî û formên xwe, xwedî stratejiyeke hevparebûnê em in.
”Guhdarîkirina li Rêber Apo stratejîk e”
Çîgdem Dogû anî ziman ku ji bo wan mijareke stratejîk e ku Komîsyona Meclîsê li Rêber Apo guhdarî bike û got:
Li gel vê yekê divê qanûnên entegrasyona demokratîk bêne derxistin, pêvajoyeke destûra bingehîn a demokratîk bê destpêkirin û dawiya dawî jî nêzîkatiyeke hiqûqî ya bitunî li pirsgirêka Kurd bê nîşandan.
”Girîngiya israra li ser têkoşîna rêxistinbûyî”
Çîgdem Dogû işaret bi çalakiyên li Bakurê Kurdistanê kir ku ji bo Rojîn Kabaîş hatin kirin û wiha bi lêv kir:
Bi wesîleya 25’ê Mijdarê em careke din fêhm dikin ku em qasî bi rêxistin û zane têbikoşin, em çiqasî israr bikin wê tundiya mêr jî ewqasî kêm û bi dawî bibe.
Gelekî girîng e, rêbazeke têkoşînê ya bi israr bê afirandin ku dema êrişên bi vî rengî bû bide pey û li hemberî wan têbikoşe.
”PKK’ê nirxên bi wate afirand”
Her wiha Çîgdem Dogû bal kişand ser mijara salvegera damezrandina PKK’ê ku wê di 27’ê Mijdarê de bê pîrozkirin û dibêje:
27’ê Mijdarê roja vejîna neteweyî ye.
PKK’ê exlaqek afirand, çandek afirand, felsefe afirand, nirxên bi wate afirand, şehîdên mezin afirand.
Em bang li hemû welatparêzan dikin ku 27’ê Mijdarê jî çalakiyan lidar bixin.
”Em bang li her kesî dikin ku tevlî çalakiya 8’ê Mijdarê bibin”
Di dawiyê Çîgdem Dogû têkildarî çalakiya ku 8’ê Mijdarê li Kolnê ji bo azadiya fîzîkî ya Rêber Apo, ji bo mafê hêviyê bê lidarxistin bang kir û got:
Azadiya fîzîkî ya Rêberê me gelekî girîng e.
Ji bo ev çalakî encamekê bi xwe re bîne û asteke bi bandor bi afirîne, ji 7 heta 70 salî bang li her kesî dikim ku tevlî bibin.
