Serokwekîla Koma DEM Partiyê Gulistan Kiliç Koçyîgît derbarê hevdîtina komîsyonê ya bi Rêber Apo re axivî,
Anî ziman ku Rêber Apo di hevdîtinê de negotiye bila QSD jî mîna PKK’ê xwe fesix bike û gotiye,
“Hêzek wê tevlî artêşa navendî bibe, hêza din jî wê parastina herêmê bike.”
Endama Komîsyona Meclîsê ya DEM Partiyê Gulistan Kiliç Koçyîgît ku li Îmraliyê hevdîtin bi Rêber Apo re kir, li ser naveroka hevdîtinê ji malpera T24 a li Tirkiyê re axivî.
Gulistanê anî ziman ku Rêber Apo di hevdîtinê de mijara Sûriyê bi berfirehî nirxandiye, lê belê di raporên meclisê de cih negirtiye.
Gulistan Kiliç Koçyîgît: Birêz Ocalan ji bo QSD’ê formulek pêşkêş kir
Gulistan destnîşan kir ku Rêber Apo li ser Hêzên Sûriyeya Demokratîk (QSD) formulek pêşkêş kiriye.
“Dibêje, hêza leşkerî dikare entegreyî artêşê bibe, ji bilî vê herêm jî dikare xwedî hêza xwe ya asayîşê be.
Hêzek wê tevlî artêşa navendî bibe, hêza din jî wê parastina herêmê bike.”
“Birêz Ocalan negot bila QSD bê şert çekan dayne û mîna PKK’ê xwe fesix bike”
Her wiha diyar kir ku Rêber Apo negotiye ku QSD bê şert û merc çekan dayne û weke PKK’ê xwe fesix bike û got îdîayên bi vî rengî rast nîne.
“Eger demokratîkbûn nebe, şera jî wê bibe dîktatorek”
Gulistan da zanîn ku Rêber Apo li ser xanedaniya malbata Esed jî nirxandin kir û ev gotinên wî parve kir,
“Bûn xanedaneke malbatê. Û em dibînin Sûriye bûye erdnîgariya herî bi êş, herî birîndar a herêmê. Îro jî dibêjin ku Şara guherî ye. Eger bi rastî jî guherî be divê demokratîkbûn bibe.
Lê belê eger demokratîkbûn nebe, Şara jî wê veguhere dîktatorekî. Di rewşeke wiha de em zanin bê wê çi bibe.”
Her wiha diyar kir ku armanca Rêber Apo ya ji vê yekê sîstemeke demokratîk e ku gelên li Sûriyê hemû bi nasnameya xwe karibin tevlî bibin û got,
“Bi rengekî eşkere û vekirî got, eger ev nebe wê dîktatorî bibe. Yanî rêveberiyeke din a Esed bi navekî nû, bi formuleke nû.
Nirxandinên giştî yên Birêz Ocalan hem ji bo Tirkiyê hem jî ji bo Sûriyê û gelê Kurd timî li ser bingeha demokrasiyê bûn.
Yanî demokrasî nêrîna wî ya bingehîn e ku nebe nabe. Lewma eger sîstema li Sûriyê wê veguhere dîktatoriyekê, bêguman hêzên Kurd wê nebin parçeyek ji vê dîktatoriyê.”
“Ocalan ji bo Tirkiye û Sûriyê di nava lêgerîna sîstemeke demokratîk de ye”
Gulistan Kiliç Koçyîgît ragihand ku perspektîfa Rêber Apo gelekî zelal û eşkere ye û got,
“Ji bo Tirkiyê, Sûriyê û Iraqê jî di nava lêgerîna sîstemeke demokratîk de ye.
Di fikrê xwe de xwedî armanceke veguherîna demokratîk e û bi rengekî eşkere vê ji bo hemû cografyayên Kurdan pêşniyar dike.
Di vê çarçoveyê de dema bê nirxandin, mijara çekan ku raya giştî ya Tirkiyê gelekî dide pêş, hingî dibe detayek.
Ya rast Birêz Ocalan careke din bang li me kir ku li ‘cewhera meseleyê’ vegerin.
Eger li Sûriyê veguherîn demokratîk nebe, wê ber bi dîktatoriyê ve biçe. Şensê kesî wê tine be ku di bin wê dîktatoriyê de bijî’.”
‘Têkiliyên bi Bakur û Rojhilatê Sûriyê re divê bê zêdekirin’
Gulistan Kiliç Koçyîgît anî ziman ku Rêber Apo di hevdîtinê de qala navên Fermandarê Giştî yê QSD’ê Mazlûm Ebdî û Hevseroka Desteya Têkiliyên Derve ya Rêveberiya Xweser Îlham Ehmed kiriye û gotiye,
“Li min guhdarî dikin, girîngiyê didin min.”
Her wiha diyar kir ku Rêber Apo destnîşan kiriye ku divê derfetên wî yên têkilîdanîna bi rêveberiya Bakur û Rojhilatê Sûriyê bêne zêdekirin.
“Ocalan got, eger şert bên afirandin wê karibe tevkariyê li çareseriya Sûriyê bike”
Gulistan Kiliç Koçyîgît anî ziman ku di naveroka notên Îmraliyê yên hatin eşkerekirin de nirxandinên berfireh ên Rêber Apo yên li ser Sûriyê nîne û got,
“Nirxandinên ji bo Sûriyê kir gelekî berfireh bûn.
Anî ziman ku ne li dijî dewleta unîter e; lê belê diyar kir ku divê Sûriye demokratîk bibe.
got; eger şert û merc bêne afirandin wê karibe tevkariyê li çareseriya pirsgirêka Sûriyê bike.”
