TEV-DEM`ê diyar kir ku têkoşîna wê, Rêveberiya Xweser, QSD û hemû hêzên demokratîk ji bo pêkanîna armancên rastîn ên gelê Sûriyeyê dewam dike û destnîşan kir “Hilweşîna rejîma Baasê nayê wateya bidawîbûna zilm û înkarê.”
Bo boneya salvegera yekem a hilweşîna rejîma Baasê, Tevgera Civaka Demokratîk (TEV-DEM) daxuyaniyek weşand.
Di daxuyaniyê de ev roj wek rojek neteweyî hat binavkirin ku tevahiya gelê Sûriyeyê bi hêviya avakirina Sûriyeyeke demokratîk û piralî beşdarî vê rojê bû.
Di daxuyaniyê de hat gotin: “Tiştê ku bi demê re eşkere bû ne li gorî xwestekên gel bû, ji ber ku ajandeyên herêmî û navneteweyî derketin holê, û ew li gorî xwe siberoja Sûriyeyê ava dikin.”
Di daxuyaniyê de hat destnîşankirin: “Hikumeta Şamê ku ji Heyet Tehrîr El Şam derketiye holê, sozên xwe yên ji gel re bi cih neaniye û ji bo xurtkirina bandora Tirkiye û Qeterê û bihêzkirina Ixwan El Muslim’n û neteweperestên nijadperest xebitî, û ev yek bû sedema komkujiyan li dijî pêkhateyên Elewî û Durzî û êrişa li dijî Xiristiyanan.”
Di daxuyaniyê de hate gotin: “Rêveberiya Xweser a Demokratîk û QSD` xwedî helbewstên durist bûn, der barê peymana 10`ê Adara 2025an, da ku Sûriyeyê nekeve nav şerê navxweyî.”
TEV-DEM`ê bang li hemû gelê Sûriyeyê kir ku “li dijî her şêweyê nakokiyên mezhebî û neteweperest bisekinin, aştiya navxweyî xurt bikin û piştgiriyê bidin QSD`ê û Rêveberiya Xweser a Demokratîk, ji ber ku ew garantiya avakirina Sûriyeyeke azad û demokratîk in.”
