Hêzên Ewlekariya Hundirîn-Jin ragihand ku li bajarê Reqayê yê Bakur û Rojhilatê Sûriyeyê 2 jinên ku jineke derdora 50 saliyê qetil kiriye û mala wê şalandine girtin.
Hêzên Ewlekariya Hundirîn-Jin ragihand ku li Reqayê 2 jinên sûcê şelandinê kirine, dûre jinek qetil kirine û cenazeyê wê şewitandine, girtin. Navên sûcdaran wiha ne; Meys Ebdurezaq El Ebdullah, di 1986ˊan de li Reqayê ji dayik bûye û Sûad Mehmed Ehmed a bi navê Um Mehmûd di 1983ˊyan de li Reqayê hatiye dinê. Ew her du jin li taxa Şueyb a bajêr rûdinin.
Der barê hûrgirliyên sûcê hatiye kirin de, Meys dibêje “Sûadê ji min re got ku em bi hev re zêran bidizin “, Sûadê jî got, “Min û Meys li hev kir ku em zêrên dotmama wê bidizin.”
Lê piştî binketina hewla şelandinê, her du jinan diyar kir ku wan carek hewl daye wê jinê bişelînin, lê vê carê ew jin qetil kirin û ji bo veşartina sûcê xwe cenaze şewitandin.
Meysê dibêje ku “Me ew li odeyekê şewitandin, dûre me zêr dizîn. Min parçeyek zêr bi 1300 dolar firot.”
Sûad jî dibêje “Min Zêrên din, cil û alavên me pê ew jin kuştiye, ji Meys vegerandin.”
Piştî 12 rojan ji sûca qetilkirinê, Tîmên Têkoşîna Dijî Tawanan ên Hêzên Ewlekariya Hundirîn-Jin nasnameyên her du sûcdaran aşkera kirin, ew girtin û ji edaletê re rakirin.
Malbata qurbanî spasiya Hêzên Ewlekariya Hundirîn-Jin li ser kedên wan ên aşkerakirina sûcdaran, kir.
Rêveberiya Tîmên Têkoşîna Dijî Tawanan diyar kri ku wan di 13ˊê Mijdara 2025ˊan de ji aliyê Nexweşxaneya Wetenî ya Reqayê agahî wergirt ku jinek hatiye şewitandin anîne nexweşxaneyê, li gorî wê tîmên taybet ên aşkerakirina cenaze ketin tevgerê û diyar bû ku sûc hatiye kirine. Piştre dest bi lêpirsînan bû, heta sûcdar hatin girtin.
