Jinên kantona Cizîrê êrişên komên çete yên li ser Rojava û binpêkirina agirbestê şermezar kirin.
Ji deverên cuda yên kantona Cizîrê bi sedan jin li Parka 4’ê Nîsanê ya bajarê Hesekê hatin gel hev û êrişên çeteyên hikumeta demkî ya Sûriyeyê yên destekê ji dewleta Tirk a dagirker digirin ên li ser Rojavayê Kurdistanê, şermezar kirin.
Çalakiya jinan bi deqeyeke rêzgirtinê dest pê kir. Piştre endama Koordînasyona Kongra Star a Kantona Cizîrê Jiyan Hisên axivî. Jiyan Hisên salvegera 11’an a rizgarkirina Kobanê ji çeteyên DAIŞ’ê, pîroz kir û berxwedana wan a li hemberî komên çete silav kir.
Jiyan Hisên da zanîn ku ew ê bi rihê berxwedana Kobanê têkoşînê bidomînin û ev li gotinên xwe zêde kir: “Em endamên Kongra Star em ê destkeftiyên ku bi keda şehîdên mîna Salîhe Erebo, Denîz Çiya û Arîn Mîrkan hatine bidestxistin biparêzin. Em soz didin ku em li ser xeta azadî, têkoşîn û berxwedanê bimeşin ta welatekî azad û demokratîk ava bikin.”
Jiyan Hisên destnîşan kir ku konsepta qirkirinê li dijî Kurdan tê kirin komployeke navneteweyî ye, armanc jê têkbirina têkoşîna Kurd û têkbirina projeya wan a demokratîk e.
Jiyan Hisên anî ziman ku planên li ser Kurdan dê bi ser nekevin, ji ber ku îradeya Kurdan ji hemû plan û komployan mezintir e.
Çalakî bi berzkirina dirûşmên silavkirina berxwedana Kobanê û Rojava bi dawî bû.
