Xwendekar, mamoste û xebatkarên Zanîngeha Kobanê piştgiriya xwe bi xwendekara bi navê Fatima Hec Mehmûd re anî ziman ku di komkujiya li gundê Xirbe Îşkê de ji her du lingên xwe bû. Her wiha bang li saziyên navneteweyî yên têkildar kir ku lêkolînekê bidin destpêkirin.
Komên hikumeta demkî yên ku piştgiriyê ji dewleta Tirk a dagirker digirin di 25’ê Çileya îsal (2026) komkujiyek li gundê Xerab Îşkê yê Kobanê pêk anî. Di encamê de ji malbatekê 5 kes şehîd bûn û 5 jî birîndar bûn. Yek ji qurbaniyên komkujiyê xwendekara Zanîngeha Kobanê Fatima Hec Mehmûd e ku ji her du lingên xwe bû.
Bi amadebûna Fatimayê, xwendekar, mamoste û xebatkarên Zanîngeha Kobanê kom bûn û der barê mijarê da daxuyaniyek. Di kombûnê de wêneyên şehîdên komkujiyê û Fatima Hec Mehmûd hatin hildan. Daxuyanî bi zimanên Kurdî û Erebî ji aliyê xwendekarên bi navên Silava Ehmed û Nûjîn Ebdê ve hat xwendin
Di daxuyaniyê de bal hat kişandin ser êrişên komên hikumeta demkî ya Sûriyeyê yên ku piştgiriya xwe ji dewleta Tirk a dagirker digirin ên li ser Kobanê û komkujiyên ku li dijî Kurdan kirine.
Di daxuyaniyê de îşaret bi komkujiya gundê Xerab Îşkê jî hat kirin û hate gotin: “Yek ji qurbaniyên komkujiyê Fatma Hec Mehmûd e. Fatma xwendekara sala yekemîn a beşa mafnasiyê ye. Di êrişa li ser gundê Xerab Îşkê de ji her du lingên xwe bû.”
Di daxuyaniyê de bi gotina ’Gelo we ev dîmena kampax dît û pozê we şewitî? Çawa keçeke ku hîn nû bi lingên xwe gavan davêje, lingên wê tê birîn?’ bêdengiya hêzên navneteweyî li hemberî komkujiyê hat şermezarkirin.
Di dewama daxuyaniyê de hate gotin “Zarokek çawa ku hîn nû çavên xwe li dunyayê venekiriye bê dê û nav dimîne. Komkujî, kuştin, birîndarî û bobelatên ku li pêşiya çavên zarok û ciwanên me rû didin, bandorek xirab li derûniya wê dike. Bi sedan birînên mezin ên bê bersiv vekirine, gelo di derûniya we de çi vekiriye? Hûn qet vê pirsê ji xwe dikin?. Peyv nikarin mezinahiya vê trajediyeya bi serê xwendekara me û malbata wê de hatiye, vebêjin. Fatma ne bi tenê navekî normal di zanîngehê de ye, lê mînakeke ji bo azwarî û biryardariyê û destpêka xewneke pêşeyî di ber rêya edalet û hiqûqê de ye. Gava ku maseyên xwendinê û xewnên pêşerojê veguhere bîranîkek biêş û wêranker, ma ev ne cihê dax û şermezariyê ye?Ev bûyer birîneke ku wijdanê me hemûyan diêşîne.”
Di daxuyaniyê de piştgiriya exlaqî û mirovî ji Fatma û malbata wê re hat nîşandan ’’da ku bi rihetî bighêje mafên xwe yên rewa.’’
Di daxuyaniyê de bang li saziyên navneteweyî û yên mafên mirovan hat kirin û hate gotin “Destên xwe deynin li ser wijdanê xwe û bi cidî li van kiryarên hovane binêrin. Bi rêya yasayan dest bi lêpirsînê bikin da ku sivîl werin parastin û nebin qurbana şerên hovane.”
Di dawiya daxuyaniyê de sersaxî ji malbatên şehîdan re û ji birîndaran re şîfa hat xwestin.
