Bi dehan xelkê bajarê Hesekê, rojnamevan û kesayetên civakî şehîd Egîd Roj di salvegera şehadeta wî ya yekemîn de li Pakrewangeha Şehîd Dijwar a gundê Dawûdiyê bi bîr anî.
Bi dehan şêniyên Hesekê bi amadebûna rojnamevan, kesayetên civakî rojnamevan Egîd Roj (Şervan Seydo) di salvegera şehadeta wî ya yekemîn de li Pakrewangeha Şehîd Dijwar a gundê Dawûdiyê yê gundewarê Hesekê de bi bîr anî.
Rojnamevan Egîd Roj di 15ˊê Sibata 2025ˊan de di êrişên dewleta Tirk a dagirker û çeteyên wê li dijî Bendava Tişrînê de şehîd bû.
Piştî deqeya rêzgirtinê, endama Meclisa Yekitiya Ragihandina Jin (YRJ) Dîlan Osman axivî ku hedefgirtina rojnamevanan ne sûcekî normal e, lê hewldana bêdengkirina dengê rastiyê û şikandina vîna gelan e.
Li aliyekî din jî berdevkê Yekîneyên Parastina Gel (YPG) Siyamend Elî got, “Tevî şehîd Egîd biçûk bû jî, lê berpirsiyariyeke mezin li hember welat, şoreş û gelê xwe hilgirtibû. Şehîd Egîd ji destpêkê ve tev li şoreşê bû, ji ber ku xeteriya li ser gel dizanî.”
Dayika şehîd Egîd, Seidet Tewfîq jî got: “Xewna Egîd her tima vegera li bajarê xwe Efrînê bû, ez bawer im ku hevrêyên wî wê vê xewnê pêk bînin.”
Merasîm bi sozdayîna berdewamkirina têkoşînê heta pêkanîna hêvî û xewnên şehîd Egîd Roj û tevahî şehîdên azadiyê bi dawî bû.
