Dewleta tirk a dagirker ku li Idlibê, derbek xurt ji Rûsya û rejîma Sûrî xwar, jimara kuştiyên xwe diveşêre. Herî dawî serokomarê Tirkiye Erdogan ragihand ku 36 leşkerên wan mirine. Lê berovajî van daneyan, tê gotin, li Idlibê 160 leşkerên dewleta tirk hatine kuştin. Rojnamevanên ku dixwazin rewşê bişopînin jî ji aliyê polîsan ve têne astengkirin.
Li Idlibê ku dewleta tirk li pey xelaskirina çeteyên xwe ye 27’ê Sibatê derbek xurt ji Rûsiya û rejîma Sûrî xwar.
Bilançoya ku bi 9’an despê kirî, herî dawî îro bi daxuyaniya serokomarê tirk Erdgan gihişt 36’an.
Her wiha tê gotin bi qasî miriyan, birîndar ji hene.
Nexweşxaneyên dewletê yên Reyhanli, Hatay û Kirikhanê ji kuştî û birîndarên dagirkeriya dewleta tirk tejî bûne.
Berevajî daxuyaniyên Walîtiya Hatayê, li Nexweşxaneya Dewletê ya Hatayê gelek leşkerên birîndar ên jiyana wan di xetereyê de hene.
Bi tu awayî nahêlin sivîl biçin cihê ku leşker lê birîndarin û xebatkarên tenduristiyê ji bajarên derdor hatine nexweşxaneyan.
Rojnamevanên dixwazin van geşedanan bişopînin, ji hêla polîs û eskeran ve tên astengkirin û her wiha ji xeynî daxuyaniyên walîtiyê û rayedarên dewletê tu tişt nayê parvekirin.
Her wiha ji penaberên li Hatay û navçeyên wê re peyam tên şandin û ji wan re dibêjin ji malên xwe dernekevin.
Li gorî agahiyên ajansa Mezopotamya spartî çavkaniyên xwe yên pêbawer,
27’ê Sibatê, êrîşî tabûra ji Kayseriyê hatiye û tabûreke din hatiye kirin.
Di êrîşê de heta niha 160 leşker mirine û nêzî 300 jî birîndar bûne.
Ji derveyî leşkeran gelek çeteyên Heyet Tehrîr Şam jî mirine.
Lê têkildarî jimara çeteyan ne agahî tên parvekirin ne jî qala wê tê kirin.
Ji xwe dengên ku di medyaya civakî de jî belav bûyî agahiyên heyî piştrast dike.
Xebatkarekî tenduristiyê jî ku nexwest navê wî bê aşkerekirin, diyar kir ku piştî êrîşê 350 ambulans çûne Deriyê Sînor ê Cîlvegoziyê û ji ber hejmara cenaze û birîndaran zêde ye ji bajarên derdorê jî ambulans hatine xwestin.
Xebatkarê tenduristiyê, got:
“Me bi xwe cenazeyên hatin jimartin.
Berevajî hejmarên fermî, hejmaar cenazeyan zêdetir e.”
Her wiha şêniyên li bajêr jî ditirsin ku êrîş çê bibin.
