Li bajarên Amûdê û Girkê Legê malbatên dîlgirtiyan xwepêşandan li dar xist û daxwaza serbestberdana zarokên xwe kir.
Malbatên dîlgirtiyan li bajarê Amûdê ji bo serbestberdana zarokên xwe yên ku ji aliyê hikumeta demkî ya Sûriyeyê ve dîl hatine girtin, xwepêşandanek li dar xist. Xwepêşandanê ji bazara bajêr dest pê kir û li Çerxerêya Jinan veguherî mîtîngê.
Şêniyên bajêr û malbatên dîlgirtiyan beşdarî çalakiyê bûn. Çalakvanan diyar kir ku pirsgirêka dîlgirtiyan pirsgirêkeke mirovî ye û bang li şêniyan kir ku berpirsyariyên xwe bi cih bîne û heta ku daxwazên wan werin bicihanîn li kêleka wan bisekine.
Beşdaran pankartên “Dîwarên zindanan nikarin rastiyê veşêrin”, “Zarokên me berdin”, “Azadî mafekî bêqusûrî ye”, “Vegera girtiyan berî her rêkeftinekê”, “Pirsgirêka girtiyan bi yek peyvê dikare were çareserkirin, çima paşxistin?” û “Dilê dayikan ji bo zarokên wan diêşe” bilind kirin.
Her wiha beşdaran dirûşmên ku daxwaza berdana dîgirtiyan dikir qîr kirin û bang li hemû aliyên peywendîdar kir ku bi baldarî li ser vê pirsgirêkê bixebitin û di zûtirîn demê de çareser bikin.
Malbatan diyar kir ku çalakiyên wan dê heta ku zarokên wan azad bibin, berdewam bikin.
Li bajarê Girkê Legê jî, xwendekarên Fakulteya Petrol û Petrolkîmyayê ya Zanîngeha Rojava daxuyaniyek li pêşiya avahiya fakulteyê da.
Mamoste Seîd Îbrahîm daxuyanî xwend. Di daxuyaniyê de xwendekaran piştgiriya xwe bi malbatên dîlgirtiyan re anî ziman û diyar kir ku çalakiya wan ji vê baweriya wan tê ku azadî û rûmet mafên hemû mirovan in û jê nayên xwarê.
Di daxuyaniyê de bêdengiya li hemberî binpêkirinan hat şermezarkirin û wek cureyeke qebûlkirina zilmê bi nav kirin.
Xwendekaran îşaret pê kir ku armanca wan ew e ku dengê mirovahiyê ragihînin û edalet pêk were. Her wiha destnîşan kir ku doza malbatên dîlgirtiyan dozeke mirovî ye. Xwendekaran di dawiya daxuyaniyê de banga piştevaniya malbatên dîlgirtiyan kir.
