Navenda Ragihandin û Çapemeniyê ya HPG’ê bi daxuyaniyekê ragihand ku yek ji fermandarên pêşeng ên YJA Starê hevrê Zozan Denîz ku ev demek dirêj bû bi îradeyeke mezin li dijî nexweşiya penceşêrê li ber xwe dida, di pêvajoya ku tedawî didît de 24’ê Hezîrana 2026’an şehîd bû.
HPG ji malbata şehîd Zozan û gelê welatparêz yê botanê re sersaxî xwest û soza domandina têkoşîn wê dan.
Navenda Ragihandin û Çapemeniyê ya HPG’ê bi daxuyaniyekê nasnameya Fermandara YJA Starê Zozan Denîz eşkere kir.
Daxuyaniya HPG ê wiha ye:
” Hevrê Zozan Denîz li dilê berxwedana civakî û dîroka Kurdistanê yanî li Botanê mezin bû û ji bo jiyana têkoşîna bênavber a 31 salan gav avêt.
Ji Şervantiyê heta fermandariya eyaletê di her qedemeyê de bi karakterê sade, dilnizm, zana û çalakvan, bû fedayî û yek ji fermandarên pêşeng a YJA Starê.
Hevrêya me Zozan Denîz li navçeya Berwarî ya Sêrtê ku parçeyekî qedîm ê Botanê ye, di nava 6 xwişk-birayan de weke ya herî mezin hate dinê.
Hîna dema zarok dayik û bavê wê ji aliyê dewleta Tirk ve hatin binçavkirin û girtin.
Ev yek ji bo wê bû xala werçerxê ya herî mezin.”
HPG ê di dewama daxuyaniyê de destnîşan kir ku hevrê Zozan xeta xwe ya berxwedanê û rizgariyê, bi naskirina Tevgera Azadiyê ya Kurdistanê dît.
Sala 1995’an weke jineke ciwan ji Mersînê berê xwe da çiyayên azad û tevlî nava refên ARGK’ê bû.
Ji pratîka xwe ya gerîlatiyê ya ewilî heta kêliya dîtina jiyana çiyê, li kelha efsanewî saha Botanê ya ku bingehê herî xurt a artêşbûna jinê lê hatiye danîn, gav avêt.
Şoreşgera 31 salan Zozan Denîz: “têkoşîna îdeolojîk bê tawîz meşand”
Di sala 2013’yan de, dema li gel rabûna Şoreşa Azadiya Rojava û di dema êrîşên hovane yên li ser destkeftiyên gelê me de, hevrêya me Zozan li gel hişmendiya berpirsiyariya dîrokî çeka xwe hilda û derbasî qada Efrînê bû.
Bi salên dirêj li Efrînê ma û ji rêxistinkirina gel bigirin heya parastina mewziyan di hemû qadan de kedên mezin nîşan dan.
Di jiyana xwe ya şoreşgerî ya 31 salan de li dijî hemû nêzîkatî û ferasetên paşverû yên derveyî Partiyê têkoşîneke îdeolojîk a bêtawîz meşand.
Hevrêya me Zozan dema li ser wezîfeya xwe ji bo azadiya gelê me bênavber têdikoşiya, bi nexweşiya penceşêrê ket.
Ji ber vê nexweşiya ku demek dirêj li hember têkoşiya, di pêvajoya 24’ê Hezîrana 2026’an de şehîd bû û tevlî karwanê nemiran bû.
HPG ê di dawiya daxuyaniyê de sersaxî ji malbata şehîd Zozan Denîz re xwest û soza xwe dûbare kir ku mîrateya wê ya pîroz û xeyalên wê teqez bi serketinê tacîdar bikin.
Agahiyên derbarê nasnameya şehîd de bi vî rengî ne:
Nasnav: Zozan Denîz
Nav û Paşnav: Suphiye Ozen
Cihê Jidayikbûnê: Sêrt
Navê Dayik – Bav: Azîze – Cumalî
Cih û Dîroka Şehadetê: 24’ê Hezîrana 2026’an / Herêmên Parastinê yên Medyayê
