Hejmarek şêniyên Efrînê yên piştî koçberiyê vegeriyan warê xwe, diyar kirin ku malbatên çeteyên û yên hawirde ji malên wan dernketine û li beramberî derketinê pereyan dixwazin.
ŞêniyekîEfrînî ku di koma 8‘emîn de vegeriya warê xwe agahî dan ajansa me û got, hîna malbatên hawirde ji mala wî derneketine.
Şênî diyar kir ku xelkê hawirde dest danîne ser mala wî ya li bajarê Efrînê û li beramberî derketina ji malê wî 2 hezar û 500 dolar xwestine.
Şênî destnîşan kir ku wî gilî pêşkêşî aliyên têkildar kiriye, lê hîna jî mala wî vala nekirine.
Tevî malan jî rûberên mezin ên zeviyên çandiniyê yên Efrîniyan hatine desteserkirin û ji bo vegerandina wan li xwediyên wan pereyan dixwazin.
Li gorî agahiyên ku ji navçeya Şiyê jî hatine bidestxistin, ‘‘Lîwaya 30‘an‘‘ û ‘‘Firqeya 25‘an‘‘ ku Ebû Emşe serkêşiya wan dike, serweriya xwe li ser navçeya Şiyê ferz kiriye û pereyan ji xelkê distînin. Her wiha avahiya postexaneyê û 3 malên şêniyan veguherandine baregehên leşkerî û lojîsîkê. Qedexe ye tu kes nêzî van baregehan bibin.
Çavkaniyekî dane zanîn ku 521 malbatên çeteyan li navçeyê Şiyê, her wiha li Efrînê 5 hezar malbatên hawirde ku piraniya wan ji Dêrazorê ne hene.
Dewleta Tirk a dagirker û çeteyên wê ku di sala 2018‘an de Efrîn dagir kirine, xelkê wê dan koçber kirin, demgorafiya herêmê guhertin û malbatên çeteyên yên Idlib, Dêrezor, Ezaz, Hema, Humis di malên xelkên resen de bi cih kirin.
Di çarçoveya peymana 9‘ê Çileyê ya navbera QSD û hikumeta demkî ya Sûriyeyê de ku yek xalên wê vegera ewle ya koçberan li ser warê xwe, koçberên Efrînê kom bi kom vegeriyan ser axa xwe.
Tevî peymanê jî, lê heya niha hîna bi hezaran malên Efrîniyan ji malbatên çeteyan û hawirde nehatine valakirin.
