Hevserokê KONGRA GEL Remzî Kartal derbarê pêvajoya aştî û civaka demokratîk û çarçoveya qanûnî de axivî.
Remzî Kartal bi bîr xist ku ji 24’ê Gulanê ve hevdîtin bi Rêber Apo re nayê kirin û wiha anî ziman:
Dibe ku ev astengî ji ber lihevnekirina li ser qanûna çarçoveyê be:
Eger qanûn bêyî nêrîna Rêber Apo û Tevgerê bê amadekirin, dibe ku xetimandina pêvajoyê dewam bike.
Pêvajoya Aştî û Civaka Demokratîk ya Rêber Apo destpê kir, di qonaxeke krîtîk de ye.
Tevgera Azadiya Kurdistanê û raya giştî ji bo rêveçûna pêvjaoyê li bendê ne ku qanûna çarçoveyê bê amadekirin, bikeve rojeva Meclîsê û bibe qanûn.
Nîqaşên li ser qanûna çarçoveyê têne kirin jî li ser naverok û garantiyên hiqûqî ye.
Li aliyê din jî 24’ê Gulanê û vir ve bi muzakerevanê sereke yê pêvajoyê Rêber Apo re ti hevdîtin nehatiye kirin.
Hevserokê KONGRA GEL Remzî Kartal derbarê mijarê ji ajansa ANF’ê re axivî.
Remzî Kartal: Têkildarî qanûna çarçoveyê ti agahî negihîştiye me
Remzî Kartal diyar kir ku têkildarî çarçoveya qanûnî, ti agahî ji me re yan jî ji tevgera me re nehatiye ragihandin û got:
Di hevdîtina dawî ya bi Rêber Apo re ku 24’ê Gulanê pêk hat.
Rêber Apo anî ziman ku çaroveya qanûnê wê bi wî re bê parvekirin, divê bê parvekirin û wê nêrînên xwe di vê çarçoveyê de pêşkêş bike.
Lê belê ji wê demê û vir ve bi Rêber Apo re ti hevdîtin nehatiye kirin.
Ne Heyeta Îmraliyê ne jî parêzerên wî karîbûn pê re hevdîtinê bikin. Ev yek tabloyeke gelekî neyînî ye.
Remzî Kartal: Di demeke kurt de divê hevdîtin bi Rêber Apo re bê kirin
Kartal anî ziman ku gel û tevgera me li benda bersiva wê pirsê ne, çima ji 24’ê Gulanê û vir ve hevdîtin bi Rêber Apo re nayê kirin û wiha anî ziman:
Di dema herî kurt de divê hevdîtin bi Rêber Apo re bê kirin.
Divê nêrîn û pêşniyarên Rêber Apo û Tevgerê yên li ser qanûna çarçoveyê bêne wergirtin.
Li ser bingeha diyalog û mutabaqatê divê qanûneke çarçoveyê bê amadekirin.
Di nava meha Tîrmehê de ji bo vê divê gavên pêwîst bêne avêtin.
Remzî Kartal: Pêwîstî bi zemîneke hiqûqî ya berfireh a pêvajoyê heye
Remzî Kartal nîqaşên li ser naveroka qanûna çarçoveyê bi bîrxist û got:
Dema ku mirov bala xwe didin ser sernavên têkildarî qanûnê têne bilêvkirin, têgînên weke qanûna poşmaniyê, qanûna vegera li malê derdikevin pêş.
Ev nêzîkatiyên klasîk ên heta niha bûn ku perspektîfeke hêja pêşkêş nedikirin.
Ya ku divê bê kirin, weke ku Rêber Apo ji destpêkê ve got, amadekirina çarçoveya hiqûqî û qanûnî ya pêvajoyê ye, avakirina zemîna vê ye.
Pêwîstî bi zemîneke hiqûqî ya berfireh a pêvajoyê heye.
Remzî Kartal: Qanûn bêyî nerîna Rêber Apo û tevgerê pêk nayê
Di dawiyê de Remzî Kartal destnîşan kir ku dewlet û Tevgera Azadiyê ji nava vê pêvajoya şer niha qala derbasbûna li nava pêvajoyeke siyasî û demokratîk dikin.
Eger qanûn bêyî nêrîna Rêber Apo û Tevgerê bê amadekirin, dibe ku pêvajoyê mirî jidayik bike.
Hêviya me ew e ku di serî de hikumet, hemû rayedarên pêwendîdar dest ji van nêzîkatiyên şaş berdin û bi perspektîfeke rast nêzîkatiyeke rast li pêvajoyê bikin.
