Piştî 7 mehan Qeyser tê û dikeve pratîkê.. Îro ev qanûna Amerîkî ya ji bo parastina mafên sivîlan li Sûriyê, li ser hikumeta Şamê, kes û şirketên pê re didin û distînin, tê sepandin. Bi vê rewşa aborî ya zehmet re ku saet bi saet dolarê Amerîkî li beramberî lîreya Sûrî difire, gelo ev yek wê di rojên li pêşiya me de, çi bandora xwe li hikumet, bazar û gel bike?
Piştî bêhtirî 7 mehan, Qanûna Qeyser îro dikeve piratîkê..
Dewletên Yekbûyî yên Amerîka vê qanûnê ji bo parastina sivîlan û cezakirina Hikûmeta Şamê pênase dike..
Balyozxaneya Amerîka li Sûriyê herî dawî eşkere kir ku “wê qanûn hikûmeta Şamê bike armanc û dê alîkariyê mirovî ji bo gelê Sûriyê bidomîne”
Lê gelo kî li vir çi pê hat û kî ziyanê dibîne..?
Li kêleka ku dorpêçeke teng li ser Hikûmet û piştgirên wê hatiye sepandin, lê belê bi awayekî yekser sivîl zehmetiyan dibînin..
Dolarê Amerîkî li hemberî Lîreya Sûrî kêlî bi kêlî tê guhertin û lîre bi qasî 70 ji sedî nirxê xwe winda kiriye..
Helbet, hatina kelûpelan bi dolar, hişt ku her tişt bêyî cudahî, li ser xelkê buha bibe û çare li pêşiya wan zehemt bibe..
Di vir de, 3 cureyên pereyan li Sûriyê tên bikaranîn û weke ku mirov bibêje, Sûriyê parçekirî ye.
Li herêmên Hikûmeta Şamê û Rêveberiya Xweser lîreyê Sûrî..
Li deverên dagirkirî, bi awayekî fermî Lîreyê Tirkî û li gelek deverên cuda jî dolarê Amerîkî tên bikaranîn..
Şêwirmendê Amerîka ji bo Bakur û Rojhilatê Sûrî William Robak dîsa herêmên Rêveberiya Xweser ji qanûna Qeyser cuda dike..
Robak di civîneke xwe ya li gel rayedarên Rêveberiyê ragihand ku
“Bi vê qanûnê dixwazin Beşar Esed neçarî avakirina Sûriyeke demokratîk, nenavendî u pirrengî bikin û di vir de taybetmendiyên Bakur û Rojhilatê Sûrî werin parastin û mafê Kurdan misoger bibe”
Ev gotinên Robak heta niha jî li ser erdê pêk nehatine û li şûna wê, deriyê sereke Til Koçer bi biryara NY girtiye..
Rêveberiya Xweser jî, li awayê parastina aboriyê digere û gava dawî jî diyarkirina nirxê kîloya genim bi 17 sentan e..
Dîsa heman rêveberî ji bo rewşa karmendên xwe, di nava hewldanan de ye.
Tê zanîn, bi qasî 5 milyon şênî li Bakur û Rojhilatê Sûrî hene û himbêza xwe ji bêhtirî 100 hezar koçberî re vekirine..
Ji xwe girtiyên DAIŞ’ê bi tena serê xwe barekî giran e..
Qeyser ku weke nasnavekî serbzekî Artêşa Sûrî ku sala 2013 ji artêşê veqetiya bu, tê gotin gelek belgeyên hovîtiya hikûmetê radestî Amerîka kiriye û li ser wî bingehî ev qanûn hate sepandin..
Niha jî pirsa derdikeve ew e, “Gelo Qanûna Qeyser wê Hikûmeta Esed hilweşîne yan jî wê xelayê li Sûriyê rake”
