Cîgirê hevserokatiya Meclisa Rêveber a Rêveberiya Xweser a Bakur û Rojhilatê Sûriyê Bedran Çiya Kurd diyar kir ku lihevkirina ji Astanayê derketiye, ji bo razîkirina Tirkiyê ye û encamên wê ji bo veşartin û sergirtina projeyên Tirkiyê yên dagirkeriyê ne.
Cîgirê hevserokatiya Meclisa Rêveber a Rêveberiya Xweser a Bakur û Rojhilatê Sûriyê Bedran Çiya Kurd encamên civîna Rûsya, Tirkiye û Îranê ya duh nirxand.
Çiya Kurd diyar kir ku armanca koma Astaneyê ne çareseriya aloziya Sûriyê ye û da zanîn ev kom dixwazin berjewendiyên xwe biparêzin.
Bedran Çiya Kurd wiha got:
“Çareserkirina pirsgirêkan ya bi vî rengî wê aloziyê kûrtir bike.
Em lihevkirinên ji civînên Astanayê derdikevin wekî razîkirina Tirkiyê dibînin.
Bi van civînan dixwazin polîtîkayên dagirkerî û Tirkkirinê yên li Efrîn, Girê Spî, Serêkaniyê veşêrin.
Di daxuyaniya wan de jî diyar dibe ku ev hêz dixwazin sûriyê perçe bikin.”
Bedran Çiya Kurd: Em encamê vê civînê ku nûnertiya me nake qebul nakin
Çiya Kurd destnîşan kir ku ew piştgiriya çareseriya siyasî bi pêşxistina diyalogên Sûrî-Sûrî dikin û diyar kir ku ti altirnatîfên wê jî tune ne.
Çiya Kurd dazanîn tiştên li Cinêvê li ser hatine lihevkirin ne li gorî biryarên meclisa ewlehiyê ne ku tekeziyê bi girîngiya beşdarbûna hemû nûnerên Sûriyê bêyî dûrxistina aliyekî dike û got:
“Em dibînin ku hemû nûnerên Bakur û Rojhilatê Sûriyê hatine dûrxistin.
Di vê rewşê de em bi zelalî ji raya giştî re dibêjin em encamên vê komîteya ku nûnertiya me nake, qebûl nakin.
Avakirina komîteyeke bi vî rengî ji bo razîkirina Tirkiyê û siyaseta wê ye û ji bo aloziya Sûriyê çareserî nîne.”
Bedran Çiya Kurd: Astana miriye, ji aloziya Sûrî re çareseriyê nabîne
Çiya Kurd destnîşan kir ku tekane astengî li pêşiya çareseriya aloziya Sûriyê, dewleta Tirk e ku girêdayî ti biryar an lihevkirinan namîne û got, “Ger wiha be, Astana mirî ye û ji pirsgirêka Sûriyê re nabe çareserî.”
Tê zanîn, heta niha 14 civînên Astanayê hatine lidarxistin, lê ti gavek ji bo çareseriya aloziya Sûriyê nehatiye avêtin.
