Êrîşa 3’ê Tebaxa 2014’an a ku çeteyên DAÎŞ’ê bi ser Êzîdiyên Şengalê de pêk anî, ji bo her jinekê çîrokek bi êş e. Di wê rojê de bi hezaran Êzîdî hatin kuştin, jin û zarok hatin revandin. Têkildarî mijarê Endama Koordînasyona Jin a Mala Êzidiyan a bajarê Helebê Ranya Cafer axivî û da zanîn ku bûyera li Şengalê, li Efrînê dubare dibe. Ranya bang li jinan kir ku li dijî van êrîşan bibin yek.
Em di sedsala 21’an de ne, lê mixabin bi van rewşan em bi hezaran salan paş de vegeriyane, em vegeriya serdema nezaniyê.
Di vê sedsalê de, jin hatin revandin, firtotin, kuştin û destdirêjî li wan hat kirin.
Heta niha jî pir jinên Êzîdî li Efrînê hene ku rastî heman kirinan ên bi destê dewleta Tirk tên.
Cilên reş li wan dikin, wan dibin mizgeftan û ola Îsalmê ya li gorî xwe li wan ferz dikin.
Em gelek caran bang li rêxistinên mafê mirovan dikin, lê ne mafê jinan û ne jî yê zarokan li gel wan heye.
Mafê ku qaşo dibêjin em didin, tenê nivîskî ye, lê pratîk tune ye.
Mixabin me nedît ti rêxistinên mafê mirovan li kêleka jina Êzîdî sekinî û qala mafê wê kir.
Nikaribûn heqê wê ji çeteyên ku ew firotine bixwastana.
Em bang li hemû jinên Cîhanê dikin ku li dijî van kirinan bibin yek.
Ji bo rawestandina komkujiyan, divê mafê jin, zarok û mirovan bê dayîn.
