Civînên ku li derve qaşo ji bo çareseriya alozîya Sûriyê tên lidarxistin bê encam dimînin. Hevdîtinên li Cinêv jî yek ji wan e. Li Cinêv cara sêyemîn hevdîtinên ku ji bo nivîsandina destûra bingehîn ya Sûrîyê hatin kirin dîsa bê encam bi dawî bû.
Bi armanca ji nûve nivîsandina destûra bingehîn ya Sûrîyê û bi dawîkirina aloziya Sûriyê komîteya Destûrî carek din li Cinêvê li hev civiya.
Civîna ku wê 24’ê Tabaxê pêk bihata, ji ber hin endamên Komîteyê bi vîrûsê ketibûn rojek hat taloqkirin.
Duh civîn careke din bê encam bi dawî bû.
Dezgehên ragihandinê yên Rûsyayê eşkere kirin ku di civînê de ti pêşketin derneketiye holê û dema gera çarem jî nehatiye diyar kirin.
Nûnerê Neteweyên Yekbûyî yê Sûriyê Geir Pedersen got beşdar gihiştin hin nuqteyên hevbeş û dibe civînên din bên lidarxistin.
Ev cara sêyemîne ku hevdîtinên ji bo destûra binegehîn a Sûriyê tên lidarxistin lê belê, gaveke ber bi çav nehatiye avêtin.
Diyare ger ku Kurd û rêveberiya xweser ya bakur û rojhilatê Sûriyê beşdarî van civînan neyên kirin wê ev hevdîtin ti encamê negirin.
Di dema lidarxistina civînê de, MSD’ê ragihandibû ku “Civîna ku ew lê ne amade bin ew ê ti biryarên wê jî nas nekin.
Rêveberiya xweser jî ragihand bû ku ji ber nûnerên 5 milyon kesî di komîteya destûrî de cih nagirin lewra jî ew encamên van civînan jî qebûl nakin.
