Cîgirê Hevserokatiya Rêveberiya Xweser Bedran Çiya Kurd derbarê biryara valakirina kampa holê ji koçberên sûrî de, diyar kir ku derxistina ji kampê wê bi dilwazî be. Ji bo malbatên biyanî jî, Çiyakurd anî ziman ku ew ê bi welatên ku dixwazin hemwelatiyên xwe vegerînin re hevkar be.
Cîgirê Hevserokatiya Rêveberiya Xweser a Bakur û Rojhilatê Sûriyê Bedran ÇiyaKurd têkildarî biryara valakirina kampê Holê ji koçberên Sûrî ji ajansa ANHA’yê re axivî.
Bedran ÇiyaKurd pirsgirêka kampa Holê bi pirsgirêkeke tevlihev û bi girêk bi nav kir û diyar kir ku derxistina malbatên Sûrî ji kampê ji berî demekê ve dest pê kiribû û li gorî beşan berdewam e û wiha got:
Wê malbatên Sûrî bên derxistin ji ku ber ew ne dîl, ne jî girtî ne heta ku di kampê de bimînin.
Di demên dawî de me li ser girîngiya lezkirina derxistina Sûriyan ji kampê nîqaş kiribû, pêwîstiya hebûna wan li kampan êdî nîne.
Biryara derxistina malbatên Sûrî ji kampê li ser daxwaziya şêxên êlan e, ew dikarin bi awayekî ewledar li malên xwe vegerin.
Çiyakurd: Derxistin dilxwazî ye, hejmareke mezin naxwazin derkevin
Çiyakurd diyar kir ku derxistina koçberan wê bi dilxwazî, ne bi zorê be, jimareke mezin heye naxwazin ku ji kampê derkevin, ji ber rewşa jiyanî û aborî ya zehmet û bi taybet li herêmên hikumeta Şamê.
Cîgirê Hevserokatiya Rêveberiya Xweser têkildarî mijara vegera penaberên Iraqê yên li kampê destnîşan kir ku li gel hikumeta Iraqê bernameya vegerandina wan nîne.
Eger dosyaya malbatên biyanî çareser nebe, wê bobelatek mezin çêbibe
Çiyakurd da zanîn ku eger ji bo dosayaya malbatên DAIŞ’î yên biyanî çareserî neyê dîtin, wê bobelateke mezin çêbe, ew ê bi welatên ku dixwazin hemwelatiyên xwe vegerînin re hevkar bin.
Çeteyên Sûrî tên dadgehkirin, destê wan di kirên terorîst tine ye
Cîgirê Hevserokatiya Rêveberiya Xweser îşaret bi dadgehkirina 900 hezar çeteyên DAIŞ’ê yên Sûrî jî kir û da zanîn ku nîqaş bi girîngiya serbestberdana kesên ku lêpirsîn bi wan re hate kirin û îsbat bû ku destê wan di kirinê terorîst de nîne encam da.
Her wiha, rewşa girtiyên din dê li gorî biryara “Efûya Giştî” were nîqaşkirin, da ku sûcdar radestî dadgehê werin kirin.
