Jinên li Sûriyê, ji ber bê-karî, koçberî û binpêkirinên li dijî wê êşê dikişînin. Di nava 9 salên ji aloziya Sûriyê de, yê herî zêde berdêl dayî jin bûn, jin li herêmên hikumeta Şamê tên paşguh-kirin, li herêmên dagirkirî jî rastî heqaret û destavêtinê tên.. Bi vî awayî mafê jinê li Suriyê tê binpêkirin. Lê li herêmên rêveberiya xweser jin xwedî maf û biryar in.
Dagirkerî û şerê çekdarî sedemên sereke yê koçberî û penaberiyê ne û ji vê yekê jî jin êş û azaran dikişîne.
Ev yek dihêle ku bingehên civakî ji hev bikevin, di encama wê de jin hîn bêhtir tune bibe û newekheviya ku berê heye, kûrtir bibe.
Pê re jî tundiya li ser jinê di civakê de hîn bêhtir xurtir dibe.
Ev ji dibe sedem ku jin di aliyê derûnî, fîzîkî de rastî pirsgirêkên kur bên.
Jinên li Sûriyê di nava vê aloziyê de, herî zêde rastî binpêkirin derexlaqî û dijmirovî hatin.
Tora Mafê Mirovan a Sûrî eşkre kir ku ji destpêka aloziyê û heta niha
28 hezar û 316 jin hatine kuştin
Çarenûsa 6 hezar û 668 jinên revandî nediyar e
Li herêmên hikûmeta Şamê jin ji tevahî mafan bê par in
Çavdêriyê Sûrî ya Mafê Mirovan ragihand ku li gelek herêmên li Suriyê ku di bin serweriya hikumeta Şamê de, tevî ku şer lê rawestî ye, pirsgirên ku jin dijîn lê bidawî nebûne.
Jin heta niha tên paşguhkirin, bêkar û bêmaf dimînin.
Tevî aloziya aborî li Suriyê jî jinên karmend bi heqdesteke gelekî kêm kar dikin..
Her wiha ji ber rûxandin û wêrankirina dibistanan, jimarek ji jinên ciwan ji dibistanê qut bûn, bêperwerde jî mane.
Jin rastî heqaret, biçûkxistin û destavêtinê tên.
Li herêmên dagirkirî ji bilî revandin û destavêtinê jin têne kuştin
Li aliyê din jî rewşa jinan li herêmên dagirkirî, xerabtir e.
Herêmên ku ji aliyê dewleta Tirk a dagirker û çeteyên xwe ve hatine dagirkirin, jin lê rastî her cure tundî, heqaret, revandin, kuştinê, destdirêjî, êşkenceya cinsî, zewaca bizorê, neçarkirina li ser pêkanîna laşfiroşiyê, ducanîbûn, jiberkirin û gihandina nexweşiyan, tên.
Rêxistina Mafê Mirovan a Efrînê revandina
Zêdetirî hezar jinî
Windabûna bêtirî 400 jin
Kuştina 85 jinan
Destdirêjiya li 67 jinan
Xwekuştina 5 jinan û
birîndarbûna 175 jinan li Efrîna dagirkirî belge kirine.
Li Idlibê bi taybet, ji ber bêkariya ku 90% derbas kiriye diyardeya parsê zêdetir bûye.
DAIŞ’ê jiyan li jinê kir dojeh
Her wiha di pêvajoya derketina DAIŞ’ê de li Sûriyê jî jinan ji ber DAIŞ’ê jiyaneke tarî û durî pîravên mirovahiyê jiyan kirin û tevahî mafê wan hate binpêkirin.
Jina ku rastî van hemû mercên zehmet û keysbaziyê tê, nikare devê xwe veke, ji ber du caran tê kuştin, carekê li ser destên dijmin û carekê jî ji aliyê civak û malbatê ve.
Li herêmên rêveberiya xweser jin xwedî biryar û maf in
Lê li herêmên bakûr û rojhilatê Sûrî rewşa jin cudatir e..
Jinên li herêmên Rêveberiya Xweser, xwe birêxidtinkirine û bi awayekî wekhev di qada siyasî, civakî û leşkerî de cih digirin û xwedî biryar in.
