Çeteyên ku li Tebqa û Reqayê teqînin pêk anîbûn û hatine girtin, niha behsa tevlîbûn û çetetiya xwe dikin. Çeteyên girtî diyar kir ku ji wan hat xwestin li bajarên Reqa û Tebqayê teqînan pêk bînin û erebeyên leşkerî yên QSDê bikin armanc.
QSD’ê daye ser pişta şaneyên veşartî yên DAIŞê û bi operasyonên taybet wan dide ber hev..
Yek ji çeteyên DAIŞ’ê yên di encama van operasyonan de hatiye girtin, Ehmed Elî El-Hemûd e.
El-Hemûd ji Tebqa ye û bi rêya zilamekî bi navê Ubeyde ku ji bajarê Idlibê ye, beramberî pereyan çetetiyê qebûl dike da li bajarê Reqayê teqînan pêk bîne.
Ehmed Elî El-Hemûd di hevpeyvînekê li gel Ajansa Nûçeyan ANHAyê de, weke çete li xwe mukur tê.
Piştî min çek wergirt, meha Remezanê ya 2020, min xwest alîkarekî min ê vî karî hebe.
Ubeyde ji min re motorsiklêtek anî û got karê xwe berdewam bike heta em komeke kes amade bikin.
Paşê ji min hat xwestin ez mayînekê biteqîne û dîmenê wê ji wan re rê bikim.
Min mayîn li ser rêya Mehmûdilî çand.
Dema erebeyeke QSD’ê hat, min ji dûr ve mayîn teqand.
2 kes di erebeyê de hebûn, lê tiştek bi wan nehat.
Çeteyê DAIŞ’ê Ehmed El-Hemûd diyar kir ku piştre wî bi kesekî din ê bi navê Ebû Ehmed re kar kiriye.
Ebû Ehmed got mayînan biçîne û dema erebeyên leşkerî hatin, tu dê dîmenê teqînê bigire û ez jî mayînê biteqînim.
Herî dawî dema em li motorsikilêtê siwar bûn û em bi lez çûn, erebeya leşkerî hat û em girtin.
Çeteyê din ê DAIŞê yê bi navê Ehmed Elî Silêman jî axivî.
Silêman ji bajarokê Meskene yê bi ser Minbicê ve ye û bi rêya kesekî bi navê Ebû Hisên ji bo karê teqemeniyê tevlî şaneyên DAIŞ’ê dibe.
Ebû Hisen ji min re got tu dê li derdora gundên Reqayê li dijî erebeyên QSD’ê mayînan biteqîne. Min jî qebûl kir.
Piştî demekê, Silêman û Ebû Hisên ji Meskene tên Reqayê da teqînan pêk bînin.
Piştî Ehmed Silêman rêyan nas dike, çend rojan li derdorê Reqayê dimîne û 5’ê Mijdara 2020 diçin Reqayê û Silêman tevî kesekî din mayînan diçînin.
Piştre Ebû Hisên hebeke hişbir dide Silêman û dihêle mayînê biteqîne.
Piştî min ew heb vexwar, êdî min tişek hîs nekir. Eger zarokekî piçûk ji min re bianiyana jî min ê bikuşta.
Paşê em çûn cihê teqînê û dema erebeyeke QSD’ê derbas bû, min ew teqand.
Ez bi motorsikletî reviyam, lê bi rê de ez hatim girtin.
