Jinên ji navçeya Eyn Îsayê di derbarê êrîşên dewleta tirk û çeteyên wê li ser navçeyê nêrîna xwe anîn ziman û gotin: “Rewş li Eyn Îsayê êdî nema aram e, em dewleta tirk li ser axa xwe naxwazin, bila êdî sînorek ji dewleta tirk re bê danîn, ji barê koçberiyê em westiyan.
Piştî ku hêzên Rûsî baregehên xwe li Eyn Îsayê bi cih kirin, ji wê rojê de êrîş li ser navçeya Eyn Îsayê zêdebûne.
Rojan e kampa koçberan, rêya M4, gundewarên navçeyê rastî topbaranê tên.
Bi van êrîşan re jî têkoşîneke bê hema li dijî dagirkeriyê tê meşandin.
Têkildarî mijarê, jinên ji Navçeya Eyn Îsayê êrîşên dewleta tirk şermezarkirin û nêrîna xwe anîn ziman.
Fatme Qesîr ji pêkhateya erebe û li navçeyê dijî, da zanîn ku ji ber topbarana dewleta tirk koçberî çêbûye û got:
Bila êdî sînorek ji dewleta tirk re bê dayin, ji barê koçberiyê em westiyan.
Ewaş Ismail jî diyar kir ku ew êdî nema dikarin van êşan tehmûl bikin, tenê xeta berxwedanê li pêşiya me ye.
Ezîze Xelef destnîşan kir ku dewleta tirk û çeteyên wî bi rêya van êrîşan dixwazin gel di komkujiyan re derbas bikin.
Sayime Îsa jî behsa hovîtiya êrîşan kir û wiha anî ziman:
Em bang li dewletên navnetewî dikin ku êdî sînorekî ji dagirkeriya tirkiyê re deyinin.
”Ez li hêviya mizgîniya rizgarkirina gundê xwe me”
Ayişa Şêx Salih a 45 salî ku ji ber êrîşên dewleta tirk koçî gundê Til Rumanê bûye, rêwîtiya koçberiya xwe anî ziman û got:
Ez neçarî koçberiyê bûm û min her tişt li peyî xwe hişt, niha tenê hawûzê avê yê gundê Til Rumanê bi dest me ketiye.
Em dixwazin ku dewleta tirk li ser kirinên ku derheqê me de kiriye û dagirkirina wan a axa me were cezakirin.
Pêwîst e dewleta tirk ji axa me derkeve, da ku em vegerin ser axa xwe.
