Tevgera Azadiya Jinên Êzidî TAJÊ, Sîwana Meclisên Jinên Êzidî SMJÊ û Tevgera Azadî bi daxuyaniyan 8’ê Adarê Roja Jinan a Cîhanî pîroz kir û got: ”Em erka xwe dibînin ku her rojê bi ruhê 8 Adarê û bi taybet bi ruhê serketina Garê pêşwazî bikin”.
Tevgera Azadiya Jinên Êzidî TAJÊ û Sîwana Meclisên Jinên Êzidî SMJÊ bi daxuyaniyeke hevpar 8’ê Adarê Roja Jinan a Cîhanî li Rêber APO û tevahî jinên cîhanê pîroz kir.
Di daxuyaniyê de hate ragihandin ku jinên Êzidî di encama têkoşîna salan de bûne xwedî vîn û hêz.
Aliyan got:
Jinên Êzidî zincîrên koletiyê di asta herî jor de şikandine û ji bo gelê xwe bûne pêşeng.
Her wiha hate bibîrxistin ku fermana 3’ê Tebaxa 2014’an jî di nav de di her fermanê de jinên Êzidî tevî ku bûne qurban, her tim civak û çanda xwe parastine.
TAJÊ û SMJÊ di dawiya daxuyaniyê de anî ziman ku:
Em erka xwe dibînin ku her roj bi ruhê 8 Adarê û bi taybet bi ruhê serketina Garê tevbigerin.
Şikandina pergala desthiladar tenê bi vîn û hêza Jinan pêkan e.
Tevgera Azadî: Em ê ji bo azadiya jinan têkoşîna xwe dewam bikin
Tevgera Azadî jî bi daxuyaniyek nivîskî 8’ê Adarê li hemû jinên Kurd pîroz kir û ew weke rojek birumet di dîroka xebata azadiya jinê de pênase kir.
Tevgerê got:
Divê li dijî bê-edaletî, binpêkirin û nehevsengiyê hemû rojên salê têkoşîna azadîxwaz dewam bike.
Tevgera Azadî di dawiyê de diyar kir ku ew weke tevgerek siyasî û civakî, erkê wa ye ku ji bo azadiya jinan û civakê kar bikin û têkoşîna xwe bidomînin.
