Hefteyeke şerê di navbera Hamasê û Îsraîlê de li Xezayê dewam dike. Hejmara kuştî û birîndaran roj bi roj zêde dibe. Li ser vê mijarê gelek welat û sazîyên navnetewî diaxivin û fikarên xwe tînin ziman. Lê heta niha ji bo rawestandina şer ti gavek nehatiye avêtin.
Artêşa Îsraîlê serê vê sibê careke din êrîş bir ser bajêr. Heta niha hejmara kesên ku ji ber şer jiyana xwe ji dest dane ji 200 î derbas kir.
Di navbera Hamas a Filistînê û Îsraîlê de hefteyeke şer dewam dike. Navenda vî şerî jî bajarê Xezayê ye. Roj bi roj hejmara windahiyên ji ber şer zêde dibin.
Îsraîlê ragihand ku duh bi şev jî li dijî tunelên binerd yên li Xezayê êrîş pêk anîne. Hat diyar kirin rê, kampên leşkerî û avahiyên ewlehiyê yên li Xezayê hedef hatine girtin.
Wezareta Tenduristiyê a Filistînê bi daxuyaniyekê ragihand ku ji ber êrîşên Îsraîlê yên ji roja yekşemê û pêde ku pêk anîne, jê 16 jin, 10 zarok bi giştî 42 Filistinîyan jiyana xwe ji dest dan.
Li gorî daneyên Wezareta Tenduristiyê ya Filistînê ji 10’ê Gulanê ve ji ber êrîşên Îsraîlê jê 58 zarok, 34 jin herî kêm 197 Fîlîstînî hatine kuştin û zêdeyî 1200 kes jî birîndar bûne.
Şêniyên Xezayê dibêjin heta niha di vê astê de êrişeke hewayî li dijî wan nehatiye kirin.
Hat diyar kirin li aliyê Îsraîlê jî 10 kes hatin kuştin ku yek ji wan zarok e û 282 kes birîndar bûn.
Li aliyê din Neteweyên Yekbûyî (NY) ragihand ku ji ber şerê li Xezayê 42 hezar Filistinîyan malên xwe terikandine.
Ji bo rawestandina şer hewldanên dîplomatîk jî dewam dikin.
Wezîrê Karên Derve yê Amerîkayê Antony Blînken di serdana xwe Danîmarkayê de derkete pêşberî çapemeniyê û derbarê miarê de axivî.
Blînken diyar kir Amerîka ji ber şerê di navbera Filistîn û Îsraîlê bi fikar e û wiha got,
“Ji bo ku ev şer raweste DYA bi şev û roj bi navbeynkariya rêyên dîplomatîk dixebite. Em amade ne ji bo agirbestê piştgiriyê bikin.
Ez dubare dibêjim ku mafê parastina rewa ya Îsraîlê heye. Em bang li Hamas û komên din yên li Xezayê dikin ku êrîşên xwe yên bi moşekan rawestînin.”
Melîkê Urdinê Abdullah jî diyar kir ku ji bo rijandina xwînê raweste ew di nava hewldanan de ye.
Di civîna Konseya Ewlekariyê a Neteweyên Yekbûyî de ku duh pêk hat, DYA’yê diyar kir ew amade ne ku piştgiriyê bidin agirbestê.
