Êrîşên dewleta Tirk a dagiker yên li ser başûrê Kurdistanê dewam dikin û nerazîbûn jî her diçin zêde dibin.
Balafirên şer îro derdora gundên Mijê û Spîndara yên Amediyê bombebaran kirin.
Endamê Komîteya Ewlehiyê ya parlementa Iraqê Bedir Ziyadî jî got ku Tirkiye plan dike 20 hezar leşkeran li Başûrê Kurdistanê bi cih bike û bang li hikumeta Iraqê kir ku helwesteke cidî nîşan bide.
Hevdîtinên şandeya KNK’ê ya ji bo yekîtiyê û helwestek hevpar ya li dijî dagirkeriyê jî berdewam dikin.
Êrîşên dagirkeriyê yên li ser başûrê Kurdistanê didomin û nerazîbûnên li dijî êrîşan jî her diçe zêde dibin.
Balafirên şer ên Tirkiyê ji duh ve derdora gundên Mijê û Spîndara ya Amediyê bombebaran dikin.
Di encama bombebaranê de agir bi daristanên herêmê ketiye.
Her du gund 5 kîlometre ji navçeya Amediyê dûr in.
Duh di encama bombebarana gundê Dereşê ya nêzî Spîndara de projeyeke sewalkariyê bibû armanc û di encamê de 150 pez telef bûn.
Bedir Ziyadî: Tirkiye plan dike ku 20 hezar leşkeran bi cih bike
Ji aliyê xwe ve, yek ji endamên Komîteya Ewlehiyê ya parlementa Iraqê Bedir Ziyadî têkildarê planên Tirkiyê li Iraqê daxuyaniyek da çapemeniyê.
Bedir Ziyadî got ku 70 baregehên leşkerî û nuqteyên çavdêrî yên Tirkiyê li Başûrê Kurdistanê hene û Tirkiye plan dike ku li van baregehan 20 hezar leşkeran bi cih bike.
Ziyadî diyar kir ku pêşî li êrîş û wê plana Tirkiyê ne karekî hêsan e û pêwîst e hikumeta Iraqê xwedî helwesteke cidî be.
Şandeya KNK’ê serdana Rêxistina Jinên Azad a Kurdistanê kir
Her wiha li Başûrê Kurdistanê hevdîtinên şandeya KNK’ê ya ji bo yekîtiyê û helwestek hevpar a li dijî dagirkeiryê berdewam dikin.
Di çarçoveyê de li Silêmaniyê Şandeya KNK’ê serdana Rêxistina Jinên Azad a Kurdistanê (RJAK) kir.
Rêxistina Jinên Azad a Kurdistanê (RJAK) piştgirî da KNK’ê û pêşniyar kir ku kongreya neteweyî ya jinan were lidarxistin.
Peşmerge Mele Hisên: Li dijî dagirkeriyê divê em bibin yek
Dewleta Tirk ev 2 meha dixwaze li Başûrê Kurdistanê dagirkeriya xwe berfireh bike, li hemberê vê dagirkeriyê PDK bêdeng e.
Peşmergê Kevin Hesen Yûsif Mele Hisên helwesta PDK’ê rexne kir û got:
“Dewleta Tirk dixwaze bi şerê birakujiyê bigîhîje armancên xwe.
Divê di navbeyna me û PKK’ê de şerê birakujî nebe.
PKK û pêşmerge Kurd in û bira ne. Divê PDK nehêle ku dewleta Tirk Başur dagir bike.”
Partiya Bizotnewey Demokrat a Gelê Kurdistan: Em dijî birakujiyê ne
Di heman çarçoveyê de Endamê Serkirdayetiya Bizot-newey Demokrata Gelê Kurdistanê Xelî Mehmud jî axivî û got:
“Em bi her awayî şerê birakujî red dikin., Ji bo şer çênebe em ê li gel hemû hêz û aliyên din ên Kurdî bikevin nava hewildanan da ku pêşî li vî şerî bigrin.
Divê di nava Kurdan de pêşî li şerê navxweyî were girtin û giringî bi aştiya navxweyî were dayîn.”
Zagros Endazyarî: Şandeya Aştiyê wê ji bo şkandina bêdengiya navdewletî tevbigire
Duh endamê Şandeya Aştiyê ya Navnetewî Zagors Endazyarî bi riya telefonê tevlî bernameya Bûyer ya Ronahî TV bû û derbarê xebatên Şandeya Aştiyê de axivî.
Zagors Endazyarî got ku şande 24 mehê bi fermî karê xwe li Başûr bi dawî kir û endamên Şandeyê niha ji bo şkandina bêdengiya navdewletî wê li Ewropayê tevbigirin.
Endamê Konseya Rêveber a KNK’ê Mecîd Heso banga yekîtiya Kurdî kir
Di heman bernameyê de endamê Konseya Rêbveber a KNK’ê Mecîd Heso axivî û banga yekîtiya Kurdan kir.
