Hevserokê Konseya Rêveber a KCK’ê Cemîl Bayik diyar kir tifaqa Kurd-Ereb wê rewşa Rojhilata Navîn biguherîne.
Bayik got, “Yekane hêza ku pêşî li xeyalên dewleta Tirk ên Osmaniya nû bigire, tifaqa Kurd-Ereb e. Tifaqa Kurd û Ereb a li Sûriyê jî wê ji bo Ereb û Kurdan dîrokeke nû bide destpêkirin.”
Hevserokê Konseya Rêveber a KCK’ê Cemîl Bayik li ser têkiliyên PKK’ê û Hikumeta Şamê, rewşa bakur û rojhilatê Sûriyê û tifaqa Kurd û Ereban ji rojnameya Al Nahar a li Misrê re axivî.
Cemîl Bayik bal kişande li ser têkiliyên PKK’ê û Rêveberiya Şamê yên dîrokî û wiha got:
“Têkiliya PKK’ê ya bi Sûriyê re xwedî bingeheke dîrokî ye. Têkiliya me ya bi Hafiz Esad û malbata wî re nêz û germ bû. Em ne dijberiya Sûriyê dikin ne jî dijberiya Esad dikin. Ji ber bûyerên li Rojava diqewimin nêzîkatiyeke sar û neyînî ya rêveberiya Beşar Esad li hemberî me hebe jî em neketin nava heman nêzîkatiyê. Me dostaniya Rêber Apo û malbata Esad timî hêja dît.”
Cemîl Bayik: Em alîgirê wê yekê ne ku Rêveberiya Xweser pirsgirêkan bi Şamê re çareser bike
Li ser pirsa hûn sûcdariyên PYD’ê yên li ser Rûsyayê û her wiha têkiliyên PYD’ê û Rêveberiya Xweser bi Rûsyayê re çawa dinirxînin Cemîl Bayik ev tişt anî ziman:
” Gelekî xwezayî e ku Rêveberiya Xweser têkiliyê bi her hêzeke siyasî re deyne yên ku êrişî Kurdan nakin û gelê Kurd red nakin. Em zanin ku PYD û rêveberiya xweser bi Rûsyayê re xwedî têkiliyane. Rexneyên têkildarî Rûsyayê dibe ku hebin, lê belê em zimanê êrişkar û sûcdariyê ku hûn dibêjin, rast nabînin.”
Cemîl Bayik diyar kir ku ew herdem alîgirê wê yekê bûn ku Rêveberiya Xweser bi Şamê re danûstandinan bike û pirsgirêkan çareser bike û wiha dewam kir,
“Çareseriya herî rast lihevkirina rêveberiya xweser bi hikumeta Şamê re ye. Sûriye nikare bibe Sûriya beriya sala 2011’an. Wan jî ev qebûl kirine. Bilêvkirina sîstemeke nenavendî deriyê lihevkirina bi rêveberiya xweser re vekiriye. Her wiha gotin ku perwedeya bi Kurdî wê bibe. Eger niyeta baş û helwesteke nerm a ji herdu aliyan ve bê kirin, Şam û rêveberiya xweser dikarin li ser çareseriyekê li hev bikin.”
Cemîl Bayik: Tifaqa Kurd û Ereb wê li Sûriyê dîrokeke nû bide destpêkirin
Hevserokê Konseya Rêveber ya KCK’ê Cemîl Bayik derbarê pêşeroja Bakur û Rojhilatê Sûriyê de jî ev nirxandin kir,
PKK alîgirê yekparetiya Sûriyê ye. Kurd li qadên ku lê ne bibin xwediyê xwerêveberî û xweseriya demokratîk. Qebûlkirina perwerdehiya bi Kurdî wê li ser esasê azadiya fikr û rêxistinkirinê, wê pirsgirêka demokrasî û rêveberiya herêmî çareser bike.
Sûriya Demokratîk a ku Ereb, Kurd, Suryan, Ermen, Elewî, Sunnî, Durzî û hemû gel û baweriyên din karibin xwe îfade bikin, wê li Rojhilata Navîn bibe mînak. Yekane hêza ku pêşî li xeyalên dewleta Tirk ên Osmaniya nû bigire, tifaqa Kurd-Ereb e.
Em bawer dikin ku tifaqa Kurd û Ereban a li Sûriyê, wê ji bo Ereb û Kurdan jî dîrokeke nû bide destpêkirin. Sûriye li ser vî tiştî ava bûye.
