Duh careke din li ser banga serokê rejima Tirk ya faşîst Erdogan, ji malbata Barzanîyan Mesrûr Barzanî çû Tirkiyê.
Mîna her carê di vê hevdîtinê de jî ti pîvanên protokola fermî ji bo şandeya Barzanî nehate bi cih anîn.
Erdogan ne weke serokwezîrê herêmekê lê weke waliyê xwe yê mêtingehê ew pêşwazî kir.
Vê yekê jî careke din rê li ber nîqaşan vekir.
Medya PDK’ê jî wêneyên hevdîtinê li ser weşanên xwe rakirin.
Malbata Barzanîyan êdî xwe bi temamî teslîmî dewleta Tirk ya faşîst û dagirker kirine.
Dewleta Tirk êdî başûrê Kurdistanê weke mêtingeheke xwe û her yek ji Barzanîyan jî weke waliyên mêtingehan dibîne.
Kengî pêdivî bê dîtin bang li Barzaniyan dikin û dibin ber lingên xwe.
Tevî ku başûr xwedî statuyeke fermî ye û Barzanî jî erkên wan yên mîna serokwezîr û serokê herêmî hene jî lê di çûyîna Tirkiyê de ti pîvanên protokola fermî ji bo wan nayê naskirin.
Di çûyîna Nêçîrvan ya meha Adarê de jî û duh çuyîna Mesrûr Barzanî de jî ev yek bi eşkere derket holê.
Erdogan di pêşwazî kirina wan de, di asta wezîrekî xwe de cih dide wan.
Têkiliyên malbata Barzanî û dewleta Tirk ya dijminê Kurdan li ser du armancên sereke hatiye avakirin.
Yek; berjewendiyên aborî. Malbata Barzanî dahata başûrê Kurdistanê bi temamî xistiye xizmeta dewleta Tirk.
Du; hevkariya li dijî Tevgera Azadiya Kurdistanê. Di vê sala dawî de PDK bi awayekî fermî êdî tevlî êrişên dewleta Tirk yên li dijî gerîla buye.
Dîsa li ser banga serokê rejima faşîsta ya Tirk Erdogan, Serokwezîrê Herêma Başûrê Kurdistanê Mesrûr Barzanî duh bi lez û bez çû Tirkiyê.
Hevdîtin li qesra Dolma Bahçe ya li Stenbolê pêk hat.
Di hevdîtinê de li aliyê çep yê Erdogan, Serokê MÎT’a Tirk Hakan Fidan û li aliyê rastê jî şandeya Mesrûr Barzanî ku ji 5 kesan pêk dihat hebûn.
Piştî hevdîtinê Mesrûr Barzanî 3 wêneyên hevdîtinê parve kir.
Li gorî wêneyê hatî veşandin, Erdogan weke serok derketiye û ji xwe wêneyê Mesrûr jî bi tevahî xuya nabe.
Li gorî protokolê dema ku Serokwezîrê Herêma Kurdistanê Mesrûr Barzanî serdana cihek fermî bike, pêwîste li cem ala wî welatî, ala Iraqê û Herêma Kurdistanê jî hebe, lê di vê serdanê de jî tenê ala Tirkiyê hebû.
Li gorî protokolê, divê serokên herdu şandeyan bi qasî hev xwedî hejmar bin, lê şandeya Mesrûr Barzanî hemû li aliyekê kom bûn, tenê Hakan Fidan li baramberî wan rûniştibû.
Erdogan jî weke serok û kesê yekem di navbera herdu şandeyan de li serî rûniştibû.
Ev yek jî bû sedema nîqaşan.
Ji ber nebûna hevsengiya protokolê û heqareta li şandeya Mesrûr Barzanî, Barzanî neçar ma, wêneyê ku parvekiribû li ser hesabê xwe yê facebookê û medya girêdayî xwe vekişîne.
