Hêzên Sûriyeya Demokratîk (QSD) diyar kir ku hêzên Meclisên Leşkerî yên Minbic û Babê li dijî êrişên ku dewleta Tirk a dagirker serkêşiya wan dike, berxwedanek mezin nîşan didin û ewê mafê xwe yê parastina rewa nîşana bidin.
Navenda Ragihandina QSD’ê derbarê mijarê de daxuyaniyek nivîskî weşand.
Daxuyanî wiha ye:
Hêzên Meclisa Leşkerî ya Minbic û Babê ya girêdayî Hêzên Sûriyeya Demokratîk (QSD) ev 2 rojin li eniyên Rojhilat, Rojava û Başûrê Minbicê bi êrîşên dewleta Tirk a dagirker û çeteyên wê re rû bi rû dimînin.
Artêşa Tirk a dagirker û çeteyên wê ji du rojên borî û heta niha bi balafirên bê mirov û topên giran êrişên xwe yên tund li ser gundên Til Eswed, Ceb Mexzûm, El-Hûta, Cebelt El-Hemra, Til Turin didomînin.
Ev êrîş ji aliyê odeyeke hevbeş a efserên artêşa dagirker û çeteyên wê ve tên birêvebirin.
Li hemberî êrîşên berfireh û berdewam ên heta vê kêliyê, hêzên me bi meclîsên xwe yên leşkerî berxwedaneke mezin nîşan didin.
Li hemberî hemû êrîşan rawestiyane û êriş têk birine; bi dehan çete hatine kuştin û birîndar bûne.
Ev êrîşên ku armanca wan dagirkirina herêmê û têkbirina aramiya wê ye, di çarçoveya planeke nû ya dagirkeriyê de ye ku Tirkiye hewl dide di nava xaka Sûriyê de pêk bîne.
Hêzên me careke din bibîr dixîne ku dê mafê xwe yê parastina gelê herêmê û bersivdayîna hemû êrîşan bikar bîne.
