PDK, ji bo êrîşên dewleta Tirk yên li ser başûrê Kurdistanê rewa bike, li dijî Tevgera Azadiyê ya Kurdistanê di nava dijmintiyeke mezin de ye. Ragihandina bi ser PDK’ê jî mîna ragihandina şerê Taybet yê dewleta Tirk propogandaya dewleta Tirk dike.
Îro dîsa hêzên PDK’ê êrîş birin ser kampên gerîla. HPG’ê jî PDK hişyar kir.
Dewleta Tirk a dagirker ji 23’ê Nîsana 2021’ê ve li dijî başûrê Kurdistanê êrîşeke berfireh a dagirkeriyê daye destpêkirin.
Ji bo qadên xwe yên dagirkeriyê yên li başûrê Kurdistanê berfireh bike bê navber êrîşî herêmên Zap, Metîna û Avaşînê dike.
Gerîlayên Azadiyê yên Kurdistanê jî ji bo ku rê nedin dagirkirina başûrê Kurdistanê li dijî dewleta Tirk berxwedaneke dîrokî nîşan didin.
Dewleta Tirk tevî bombebaranên bi balafirên şer, helîkopter û çekên giran heta niha gelek caran çekên kîmyawî jî li dijî garîla bikaranîye.
Li gel êrîşên dagirkeriyê xwezaya başûrê Kurdistanê jî tê talankirin.
Şirketa bi nave Cengiz a ku desthilata Erdogan piştgiriya wê dike bi alîkariya kesê bi nave Elî Ewnî yê PDK’yî ‘rêyên ewlekariyê’ çêdike, daran dibire û dibe Tirkiyê.
PDK ji destpêka êrîşên dagirkeriyê de bi daxuyanî û ragihandina xwe êrîşan rewa nîşan dide.
Bi vê yekê eşkere nebe jî bi awayekî veşartî piştgiriyê dide êrîşên dewleta Tirk yên li ser başûr.
Îro careke din li herêma Metîna ku gerîla li dijî êrîşên dagirkeriya Tirk li ber xwe dide hêzên PDK’ê êrîş birin ser kampeke gerîla.
Ji bo ku hêzên PDK’ê bi pêş de neçin û şer neqewime gerîlayan bi armanca hişyariyê gule ber bi hewayê de avêtin.
HPG’ê derbarê vê yekê de ev tişt got,
“Ji wesayitên zirxî yek jê ku guh neda vê hişyariya me û tevgera xwe dewam kir, piştre çawa derb lê ketiye ji aliyê me ve nehatiye zelalkirin. Zelal nebûye bê ka mayineke berê hatiye danîn teqiyaye an jî êrîşeke hewayî çêbûye.”
Pêşmergeyekî ku di bûyera Metînayê de birîndar bû û got:
“Em di seyareyê de bûn, diçûn nuqteyek çêbikin, ji nişkave bûyer rû da. Êrîş nebû. Me nezanî balafire, rokete an mayîne.”
Li aliyê din HPG’ê li ser hêz şandina li herêmê ber bi qadên gerîla hişyarî da.
HPG’ê got:
“Ev hêz dixwazin bikevin qadên me yên li Metîna. Em li dijî dewleta Tirk a dixwaze Kurdistanê dagir bike li ber xwe didin. Em bang li van hêzan dikin ku ji pişt ve xencerê li hêzên me nedin. Xwîna xwişk-bira nerêjin.”
Lê balkêş e ragihandina bi ser PDK’ê ku destpêkê diyar kir 5 pêşmerge ji ber êrîşên hewayî yên dewleta Tirk şehîd bûne, paşê yekser ket nav hewldana berevajî kirina buyerê û îdia kir ku ev pêşmerge di encama êrîşa gerîla de hatine kuştin.
Bi heman Rengî Wezareta Pêşmerge ya Başûr jî yekser êrîş avêt ser PKK’ê.
Ev buyer hemû nîşan didin bê ka PDK çawa êrîşên dagirkeriyê yên li ser başûr rewa dike û çawa li dijî Tevgera Azadiyê li cem dijminê gelê Kurd cihê xwe girtiye.
