Waşîngton Tirkiye xist lîsteya dewletên ku têkiliyên wan bi leşkerkirina zarokan re hene

Wezareta Karên Derve ya DYA rapora xwe ya Bazirganiya Mirovan ya 2021’an eşkere kir. Wezaretê navê Tirkiye li lîsteya dewletên ku têkiliyên wan bi leşkerkirina zarokan re hene zêde kir.
Bi vê yekê re Tirkiye bû yekem welatê endamên NATO ku cihê xwe li vê lîsteyê girtî.
Li dijî vê yekê ji Enqerê bertek derket.
Wezareta karên Derve ya Tirkiyê ev yek bi “dirûtî” binav kir û li cihê Waşîngton acreke din êrişî QSD’ê kir.

Wezareta Karên Derve ya DYA rapora xwe ya derbarê Bazirganiya Mirovan ya 2021’an eşkere kir.

Wezaretê di rapora xwe de teqezî li ser piştevaniya dewleta Tirk ya ji bo koma çeteyên Sultan Murat yên li Sûrî kir.

Di raporê de hat piştrastkirin ku ev koma çete, di şerê xwe yê li Sûrî de, zarokan weke leşker bikar têne.

Di civîna çapemeniyê de, berpirse Wezareta Karên Derve ya DYA diyar kir ku li Lîbyayê leşkerên zarok jî têne bikar anîn û Washington hêvî dike ku di vê mijarê de bi Enqereyê re bixebite.

“Bi taybetî di derbarê Tirkiyê de… yekem car endamek NATO di bin zagona pêşîlêgirtina leşkerên zarok de ket lîsteyê. Wekî serkirdeyek rêzdar û endamê NATO’yê, Tirkiye xwedî derfete ku vê pirsgirêka karanîna leşkerên zarok li Sûriye û Lîbyayê çareser bike. ”

Wezareta Karên Derve ya Tirkiyê li dijî vê yekê bertek nîşan da û xwest rastiya heyî berovajî bike.

Li cihê hewildanên çareseriya rewşê, wezaretê xwest tewambariyên li ser xwe bi serê QSD’ê de bêne.

Ajansa Reutersê jî roja pêncşemê di nûçeyek xwe ya li ser mijarê weşandî de ragihand ku Tirkiye bi rêya komên xwe yên li Sûrî li dijî mixalîfan oparasyonan pêk tîne.

Ji bo vê yekê jî komên xwe yên li herêmê bikar tîne.

NY û rêxistinên mafên mirovan van koman jî bi êrîşên bêserûber, revandin û talankirina li dijî sivîlan destnîşan dike.

NY daxwaz ji Tirkiyê dike ku van komên tundraw kontrol bike, li hemberî vê yekê Enqere van bangan bi “bêbingehî” binav dike û red dike.

Sûriye, Lîbya û Efxanistan di nav de 9 welat li nava di lîsteyê de hene

Welatên wekî; Komara Kongo ya Demokratîk, Myanmar, Somalî, Sûdan, Sûriye, Yemen, Kamerûn, Lîbya, Nîjerya, û Efxanistan ji ketin nav vê lîsteyê ku her sal ji aliyê DYA ve tê nûkirin.

Li gorî Wezareta Karên Derve ya DYA welatên ku dikevin nava lîsteyê, hin alîkariyên ewlekarî û dayîna destûrên bazirganî ji bo alavên leşkerî têne sînordarkirin.

Ajansa Reuters radigihîne ku hîn ne zelal e gelo dê Tirkiye bikeve ber van qedexeyan yan na.

Back to top button