LiTirkiyê, êrîşên nijadperest yên li dijî Kurdan zêde dibin.
Duh li bajarê Enqerê, zêdeyî sed kesên nijadperest êrîşî malbateke kirin û di encamê de 4 kes ji malbata Kurd birîndar bûn.
Li bajarê Konyayê jî komeke nijadperest bi çekan êrişî malbateke Kurd kir û di encamê de kesekî 43 salî hate kuştin.
Di 19’ê Tîrmehê de jî, karkerên Kurd ku ji Amed û Mêrdînê çûbûn bajarê Afyonê rastî êrîşa nijadperestan hatin û 7
kes birîndar bûn.
Li Tirkiyê di çarçoveya polîtîkayên nijadeperst yên desthilata AKP’ê de êrîşên li dijî kurdan her diçe zêde dibin.
Li navçeya Altindag a Enqerê, duh di saetên ber êvarê, li dijî malbateke kurd êrişa çekdarî pêk hat.
Di êrişê de 2 jê giran 4 kes birîndar bûn.
Birîndarên ji malbata Boztaş a mêrdînî rakirin Nexweşxaneyê.
Polisan 3 kes ji endamên malbatê ku hatibûn ber nexweşaneyê û bi nobedarên nexweşxaneyê re nîqaş dikirin, bin çav kirin.
Yek ji van kesên ku hat binçavkirin Erdogan Yildirim yê ku ku polîsan bi daran û gaza îsotê êrişî wan kir û bêyî pirs û lêpirsînê wan bin çav kir.
Li Konyayê di êrîşa nijadperest a dijî malbateke Kurd de kesek hate kuştin
Li bajarê Konyayê jî komeke nijadperest a ji 60 kesan pêk dihat bi çekan êrişî malbateke Kurd ku ji Amedê ye û beriya 20 salan li wir dijîn, kir.
Di êrişê de endamê malbatê yê bi navê Hakîm Dal (43) hate kuştin.
Hamdî Dal ê ku birayê Hakîm Dal e diyar kir ji ber ku ew Kurd in, êrişî wan hatiye kirin û anî ziman ku gundên derdorê zext li wan dikirin û gef li wan dixwarin ji bo ji wir biçin.
Li Taxa Bahçeşehîr a Merama Konyayê jî di 12’ê Tîrmehê de êrişî malbateke Kurd hatibû kirin, 4 jê jin 7 kes bi giranî birîndar bûbûn.
Li Afyonê, di encama êrîşê de 7 karkerên Kurd birînadar bûn
Di 19’ê Tîrmehê de jî, karkerên Kurd ku ji Amed û Mêrdînê çûbûn Afyonê bi sedema ku bi Kurdî axivîne komek nijadperestên Tirk ku ji 50 kesan pêk dihat bi dar û keviran êrîş birin ser wan û di encamê de 7 kes birîndar bûn.
Kesên birîndar bûn rakirine Nexweşxaneyê û 2 kesên birîndar ku hê dermankirina wan neqediyayî birin Emniyetê.
HDP’ê: Berpirsê êrîşa dijî karkeran desthilata AKP-MHP’ê ye
HDP’ê der barê vê êrîşê de daxuyanî da.
Berdevkê Komîsyona Çandiniyê ya HDP’ê Ridvan Turan ku daxuyanî da û got, desthilata AKP-MHP berpirsê vê êrîşê ye
Ridvan Turan diyar kir ku êrîş encama polîtîka û zimanê nefretê ye ku bi salan e li ser Kurdan tê kirin.
Turan ev êrîşa nijadperest şermezar kir û diyar kir ku Ji bo ku rûdanên mezintir çênebin, divê desthilat dev ji zimanê ku cudabûnê çêdike berde û ji bo karkarên ku diçinê çandiniyê ewlehiya wan a jiyanê biparêze.
