Nivîskarê Rojnameya Yenî Ozgur Polîtîkayê di nivîsa xwe ya bi navê “Welatparêziya Kurd” bal kişande li ser rewşa koçberên li sînorê Belarûs û Polonyayê.
Erdem bi taybetî derbarê welatiyên başûrê Kurdistanê de yên ku koç dikin, dibêje, “ciwanên Kurdan ji bo azadiyê canê xwe didin, ji bo ku ew jî li Ewropayê bijîn, nabe ku ji Kurdistanê birevin.”
Nivîskar Selahedîn Erdem bi navê “Welatparêziya Kurd” ji Rojnameya Yenî Ozgur Polîtîka de vê carê bal kişande li ser rewşa koçberên li sînorê Belarûs û Polonyayê û sedemên wê nirxand.
Erdem dibêje rewşa li ser sînorê Polonya û Belarûsê weke komkujiyekê bi nav dike û wiha dibêje,
“Gelek sedem hene ku mirov neçar dimînin ku xwe li sînorê Polonya û Belarûsê dixin.
Du sedemên vî tiştî hene. Yek jê pergala modernîteya kapîtalîst a pênc sed salî û rewşa wê ya global e.
Pênc sed sal in hemû dewlemendiyên Emerîkaya Latîn, Efrîka û Asyayê bi darê zorê hatine desteserkirin û birine Ewropayê. Li van qadan mirov ji birçînan dimirin û li Ewropayê jî bihuşteke serfkariyê hatiye avakirin. Ji ber vê jî mirovên birçî berê xwe didin vê bihuşta sexte.
Ya duyemîn jî li Emerîkaya Latîn, Efrîka û Asyayê rêveberiyên heyî piranî jê zordar û diktatoriyên mêtinger in.
Li ser civakên wir ji aliyekî ve zextên giran û zilmê dikin û ji aliyê din ve jî dewlemendiya wan didizin û pê re jî malbat û xanedaniya xwe dewlemend dikin.
Bi vî awayî mirov dikevin bin zext û birçîbûneke giran. Bi van zext û birçîbûnê mirovan ji welatên wan dûr dixînin û berê wan didin Ewropayê.
Berpirsên êşa koçberên li ser sînorê Behra Spî, Polonya û Belarûs ev hêz in û divê hesab ji wan were pirsîn.”
Selahedîn Erdem: Desthilata AKP û MHP’ê li ser koçberan şantajê li Ewropayê dike
Selahedîn Erdem derbarê siyaseta desthilata AKP û MHP’ê li ser koçberan jî wiha dibêje,
“Dîktatoriya faşîst AKP û MHP’ê li welatên cîran û ji Asya û Efrîkayê mirovan kom dikin û berê wan didin Ewropayê.
Li ser vî esasî ‘krîza penaberan’ ava dikin û ji ser wan şantajê li Yekîtiya Ewropayê dikin. Dixwazin YE dîktatoriya wan a faşîst û siyaseta qirker a ku dijminatiya Kurdan dike, qebûl bike.”
Selahedîn Erdem: PDK berpirsê reva ji Kurdistanê ye
Selahedîn Erdem li ser rola PDK’ê ya di koçberiyê de jî vê yekê tîne ziman,
“Ger rêveberiya Hewlêrê polîtîkaya rast bimeşîne, xwedî li gelê Kurd û ciwanên wê derkeve, ev kes wê dest ji Kurdistanê bernedin û nexwazin birevin Ewropayê.
Rêveberiya PDK’ê ya Hewlêrê, berpirsê reva ji Kurdistanê ne.”
Selahedîn Erdem: Divê Kurd têbikoşin û bihûşta xwe li warê xwe ava bikin
Nivîskar Selahedîn Erdem di dawiyê de ji welatiyên Kurd dixwaze ku ji Kurdistanê dernekevin û wiha dibêje,
“Tevî hehr tiştî divê mirov li warê xwe be, li hemberî kesên faşîst û mêtinger xwe bi rêxistin bike û têbikoşe û bihuşta xwe li warê xwe ava bike.
Her roj bi dehan ciwanên Kurdan ji bo azadiyê canê xwe didin, ji bo ku ew jî li Ewropayê bijîn, nabe ku ji Kurdistanê birevin.”
