Şoreşa azadiyê a Rojava, ji bo tevahî gelên cîhanê bûye çavkaniya hêviyê.
Enternasyonalîstên ku ji 20 welatên cuda hatine Rojava û di nava YPG’ê de cih digirin, qala sedema hatina xwe kirin.
Enternasyonalîstan, bal kişandin ser destkeftiyên li Rojava hatine bidestxistin û bang li herkesî kirin ku li dijî êrişan têkoşînê xurt bikin.
Şoreşa Rojava ya ku nirx û mafê gelên herêmê hemûyan bi awayekî wekhev di nava xwe de dihewine, ji bo gelên bindest bûye qada hevî û tekoşînê.
Enternasyonalîstên ji Meksîka, Îngilistan, Emerîka û Fransayê, hatine li Rojava û bi ruhê şoreşê re bûne yek, qala sedema hatina xwe ya li Rojava kirin.
Meksîkayê Şerzan: Ji bo li dijî dewleta Tirk û çeteyên wê şer bikim hatim rojava
Şervanê bi navê Şerzan Mora ji welatê Meksîkayê ye û beriya 2 salan hatiya Rojava.
Şerzan di hevpeyvîna xwe de qala têkoşîna xwe ya 2 salan a li herêmê û sedemên xwe yên ji bo hatina xwe ya li rojava kir.
Şerzan, eşkere kir ku ew ji bo li dijî çeteyên DAIŞ’ê û hevkarê wî Dewleta Tirk şer bike hatiye Rojava.
Herwiha Şerzan diyar dike ku qada Rojava tenê şer nîne û wiha dibêje:
“Li vir tenê şer nîne. Li vir di heman demê de şoreşa jinê, şoreşa civakê heye. Li vir tiştên gelekî bedew hene.”
Şoreş Qereçox: Li Rojava herê zêde vîna gel û tevgera azadiya jinê bandor li min kir
Şervanê bi navê Şoreş Qereçox jî ji Îngilistanê ye û beriya demeke kurt hatiye Rojava.
Şoreş jî anî ziman ku li Rojava tişta herî zêde bandor lê kiriye vîna gel û tevgera azadiya jinê ye.
Şoreş behsa êrişên dewleta Tirk yên li dijî herêmê dike û dibêje dewleta Tirk hewl dide bi êrişên xwe aramiya herêmê têk bibe.
Şoreş jî bang li kesên welatê xwe kir, ji bo xurtkirina şoreşa li Rojava çi ji destên wan tên bikin.
Faysal Derwêş: Li Rojava mirov dibîne ku bi hêza gel şoreşek çawa dikare bê kirin
Şervanê bi navê Faysal Derwîş yê ji Emerîkayê jî nêrînên xwe yên li ser Rojava wiha tîne ziman:
“Li vê derê tişta ku di nava şoreşê de bandor li min kir, têkiliya şoreşê ya bi civakê re ye. Gelekî bi wate ye ku mirov dibîne bi hêza gel şoreşek çawa dikare bê kirin. Mirov hêzê werdigire.”
Hogir: Ji bo Aştiya li herêmê divê Rêber Apo were berdan
Şervanê Fransî Hogir jî, êriş û sûcên dewleta Tirk yên li dijî herêmê bibîrxist û da zanîn ku ew ji bo tevlî berxwedana li dijî dewleta Tirk û çeteweyên wî bibe hatiye Rojava.
Hogir dawî de bal kişand ser tecrîda girankirî a li ser Rêber Apo û bang kir ku ji bo aştiya herêmê divê Rêber Apo were berdan.
