Şerê li girtîgeha Sînaa û êrişa şaneyên DAIŞ’ê li bîra her kesî ye.
Şerê ku di encama berxwedaneke bêhempa de 121 qehremanan canê xwe feda kir.
Umran Xilêf ê ji pêkhateya Ereb yek ji wan qehremanan bû. Malbata wî dibêje: Dema êrişê Umran li mal bû. Kêliya ku bi êrişê dibihêze yekser û bêyî dudilî tevlî şer dibe û digihêje asta şehadetê.
Ev malbat, a şehîd Umran Xilêf e.
Zaroka biçûk jî keça wî ye.
Şehîd Umran ji 121 şehîdên ku di pêngava Gurzê Gelan navên xwe di dîrokê de nivîsandine.
Bi xwe ji pêkhateya Ereb û ji gundê gundê Berkevira Herb ê Dirbêsiyê ye.
Sala 2021’ê tevlî refên QSD’ê dibe û di erka parastina girtîgeha Sînaa ya Xiwêranê de cih digire.
Malbata şehîd Umran li ser jiyan û hezkirina wî ya ji erka xwe re, ji ajansa Hawarê axivîn.
Bavê wî, Silêman Xilêf anî ziman Umran Xilêf bi wî re xebatên avahîsazî û mîkanîkê dikir, lê ji bo parastina herêmê tev li QSD’ê bû.
Bavê şehîd diyar kir ku dema çeteyên DAIŞ`ê êrişî girtîgeha Sînaa kir, kurê wî li mal bû û çawa ev agahî bihîst, berê xwe da wir da bigihêje hevalên xwe û parastinê bike.
Bavê şehîd Umran Xilêf dibêje:
“Ez bi şehadeta kurê xwe serbilind im ji ber ku herêm û cîhan careke din ji metirsiya çeteyên DAIŞ’ê parast.”
Apê wî Salih Xilêf jî, bal kişand li ser êrişên li dijî girtîgeha Sînaayê û ev got:
” Ger civata navneteweyî bêdeng bimîne û li hemberî êrişên çeteyên DAIŞ`ê bi erka xwe ranebe, êriş wê careke din were dubarekirin. ”
Ji bilî şehîd Umran Xilêf, 120 şehîdên din di berdêla parastina herêmê û cîhanê tevî de, canê xwe feda kirin.
Tevî wê û tevî hemû bangên darizandin û wergirtina çeteyên girtî, heta niha ne çete ji aliyê welatên xwe ve hatin wergirtin û ne jî dadgeheke darizandina wan hatiye avakirin.
