Yek ji sedema sereke ya êrişa Rûsya li dijî Ûkrayna, nêzbûna wî ya bo NATO bû. Serokomarê Ûkrayna Zelensky yê beriya niha li wê yekê mikur hatî ku wê ticarî nebin endamê NATO, ev gotina xwe hîna zelaltir kir. Zelensky got, li hember agirbestê û vekişîna leşkerên Rûsyayê, Kîev jî dikare dest ji endamtiya NATOyê berde. Her wiha ew amade ne, rewşa Kirim û Donbasê jî gotûbêj bikin.
Serokê Ûkraynayê Volodymyr Zelensky dubare xwest ku bi serokê Rûsyayê Vladimir Putin re rasterast hevdîtinên aştiyê pêk bîne.
Volodymyr Zelensky ji medyaya Ûkraynayê re axivî û diyar kir ew amade ne ku “bi her şêweyî” bi Pûtîn re hevdîtinê pêk bînin.
Zelensky got, heke ew rû bi rû bi Putin re necive wê nekare bêje ka Rûsya bi rastî dixwaze şer biqede yan na.
Serokê Ûkraynayê diyar kir ku ew amade ne li hember agirbest, vekişîna leşkerên Rûsyayê û garantiya ewlehiya Ûkraynayê, lêgerîna xwe ya endamtiya NATO yê biqedînin.
“Ev wê ji bo her kesî lihevkirinek bikêrhatî be. Wê ji bo Rojava ya nizane di mijara NATO de bi mere çi bike û ji bo Ûkrayna ya garantiyên ewlehiyê dixwaze û ji bo Rûsya naxwaze berfirehkirina NATOyê bêtir bibe jî wê baş be.”
Volodymyr Zelensky diyar kir ku ger bi Putin re hevdîtin bike wê rewşa Kirima ku ji aliyê Rûsyayê ve hatiye dagirkirin û herêma Donbasê ya di bin kontrola cudaxwazên bi piştgiriya Rûsyayê de ye were gotûbêjkirin.
Zelensky bi domdarî ev tişt anî ziman:
“Ez amade me ku di hevdîtina xwe ya despêkê ya bi serokê Rûsyayê re van mijaran vekim.
Eger firsendeke min a wisa hebe û Rûsya bixwaze, em dikarin van pirsgirêkan çareser bikin.
Ma em dikarin hemûyan çareser bikin? Na.
Lê şansê me heye ku em bi beşî ser bikevin û herî kêm şer rawestînin.”
Rûsiya ku di sala 2014’an de Kirim bi xwe ve girêda, serxwebûna “Komara Gel a Donetskê” û “Komara Gel a Luhanskê” ku ji aliyê cudaxwazan ve li herêma Donbasê ya li rojhilatê Ûkraynayê ye meha borî nas kiribû.
Her çend Zelensky îşaret bi wê yekê kir ku ew amade ye li ser rewşa van herêman gotûbêj bike jî, lê dîsan teqez kir ku ew navçe beşek ji Ûkraynayê ne û welatê wî teslîm nabe.
