Artêşa Iraqê bi dirêjahiya 250 km di navber Rojava û Şengalê de, dest bi lêkirina dîwarê batonê kiriye. Hevseroka Meclîsa Xweseriya Demokratîk a Şengalê Xezal Reşo û Berpirsê Karûbarên Êzidiyên li Bakur û Rojhilatê Sûriyê Cubeyr Şêx Silêman nerazîbûn nîşanda û gotin: “Lêkirina dîwar dewama peymana 9’ê cotmehê ye û bi vê dixwazin dorê li Şengalê bigrin.”
Di 9’ê cotmehê de peymanek li ser Şengalê hat îmzekirin û armanca wê ew e ku xelkê Êzidî bê parastin û bê rêveberî bê hiştin.
Vê carê jî, bi navê parastina sînor, artêşa Iraqê di navber Rojava û Şengalê de dest bi avakirina dîwar kiriye..
Ev dîwar bi dirêjahiya 250 kîlometran û bilindahiya wê jî nêzî 4 metre ye.
Xezal Reşo: Dîwar ne ji bo parastinê, ji bo dorpêçkirina Şengalê ye
Hevseroka Meclîsa Xweseriya Demokratîk a Şengalê Xezal Reşo derbarê mijarê de ji ANF’ê re axivî.
Xezal bal kişande ser xeteriya çêkirina dîwar a ji bo pêkhateyên herêmê û ev yek got:
“Di dema fermana li ser Şengalê de bi hezaran mirovên ji gelê me di vî sînorî re xwe ji qirkirinê xilas kirin..
Vî sînorî dixwazin bigrin û ev xetere.”
Xezalê eşkere kir ku dîwar ne ji bo parastinê, lê ji bo dorpêçkirina Şengalê ye û ev yek anî ziman:
“Çima bi taybet Şengal.
Wer xuyaye dixwazin bi vê yekê Peymana 9’ê Cotmehê pêk bînin û ev jî bi hevkariya dewleta Tirk û PDK’ê tê kirin.”
Hevseroka Meclîsa Xwseriya Şengalê Xezal Reşo di dawiyê de pêkhateyên Şengalê hişyar kirin û ev bang kir:
“Ev dîwar Şengaliyan naparêze.
Yên ku sînor diparastin wan bi xwe DAIŞ derbas kirin.
Ev planke qirêj e û bila gelê me bi wê neyê xapandin û li dijî wê derkeve.”
Cubeyr Silêman: Lêkirina dîwar encama peymana 9’ê Cotmehê ye
Berpirsê Karûbarên Êzidiyên li Bakur û Rojhilatê Sûriyê Cubeyr Şêx Silêman jî li ser mijarê ji ANHA`yê re axivî û lêkirina dîwar weke komplo bi nav kir..
Cubeyr Silêman diyar kir ku di sala 2014’an de rê ji çeteyên DAIŞ’ê re vekirin ku êrişî Şengalê bikin û niha jî naxwazin Êzidiyên koçber bûyî vegerin Şengalê..
Cubeyr Silêman di dewama axaftina xwe de anî ziman ku ev plan dewama peymana 9`ê Cotmeha 2020`an ne û ev yek got:
“Diyar e lêkirina dîwar jî bendeke veşartî yê vê peymanê ye..
Dewleta Tirk plan dike û hikumeta Iraqê û PDK`ê pêk tînin.”
