Li şûna ku li dibisanan perwerda xwe bibînin, li malan dibînin. Ev halê zarokên gundên Til Temirê ye.. Ji ber ku dewleta Tirk dibistanên wan topbaran kirin ew neçar man malan bikin dibistan. Mamoste Emîne Mihemed anî ziman ku dewleta Tirk bi hedefgirtina dibistanan hemû zagonên navneteweyî bin pê dike.
Tirkiyê her derê dike hedefa êrişên xwe.
Dibistanên zarokan jî ji êrişên dewleta qirker neflitîn.
Zarokên li Til Temirê ji ber topbarana Tirkiyê bê dibistan mane.
Li gorî Komîteya Rêvebirina dibistanan, 18 dibistan li xeta agir ya Til Temirê ne.
Ji wan 18 dibistanan 6 hatine topbarankirin.
Lê ev nebû sedema ku xwendin were rawestadin û her berdêl hat dîtin.
Komîteyê ji bo şagirtan, 7 mal li 7 gundan weke dibistan vekirin û 173 şagirt lê dixwînin.
Ji gundên ku mal weke dibistan lê hatî vekirin jî gundê Bab El-Ferec yê Bakurê Til Temirê ye.
Mamoste Emîne Mihemed ku şagirtên refa seretayî perwerde dike derbarê mijarê de axivî.
Emîne Mihemed balikşand ser binpêkirinên dewleta Tirk û ev tişî anî ziman:
“Ji ber gundê me dikeve xeta cebhê, Tirkiyê dibistana gund topbaran kir.
Dewleta Tirk bi hedefgirtina dibistanan hemû zagonên navdewletî û hevpeyman bin pê dike.”
Emîne behsa hewldanên dîtina berdêlan jî kir û got: ”Şer neqediya, şagirtan bêriya dibistana xwe dikirin.
Ji bo wê û li gel barîna topan, em li berdêlan geriyan. Malbatekê mala xwe da me da ku bikin dibistan.
Mal ji axê ye û temenê wê jî zêdetirî 15 sala ye.
Me li gorî derfetan mal sererast kir û dest bi perwerdeya sala 2021-2022’an kir.”
Dawiyê mamoste Emîne Mihemed bêdengiya cîhanê li hember kirinên Tirkiyê şermezar kir û got:
“Li vir binpêkirin ji zagon û hevpeymanên navdewletî re heye.
Ji mafê zarokan e ku di dibistanê de bixwînin û perwerdeya xwe bibînin.
Lê dewleta Tirk vî mafî ji wan digire û dibistanên wan topbaran dike.
Bi vî kiryarî re eşkere li ber çavên cîhanê zagonên navdewletî binpê dike.
Xeterî li ser jiyana zarokan çêdibe û ev yek divê ku neyê qebûl kirin.”
