Serçeteyê DAIŞ’ê yê ji êrişa li ser girtîgeha Hesekê berpirsyar mikur hat ku civîn û plana êrişê li herêmên di bin dagirkeriya Tirkiyê de hatine çekirin û payebilindên saziyên Tirk di nava vî karî de cih girtine.
Çeteyên DAIŞ’ê 20’ê Çileya 2022’an bi piştgiriya îstîxbarata Tirk MÎT’ê êrişeke berfireh biribûn ser girtîgeha li bajarê Hesekê ku DAIŞ’î lê girtî ne.
Bi êrişê hatibû xwestin ku girtiyên DAIŞ’î bêne revandin û bajar bi komkujiyên nû bê dagirkirin.
Bi nêzîkatiya berpirsyarane û têkoşîna QSD’ê, Hêzên Ewlekariya Hundirîn û gelê herêmê ev plan hatibû têkbirin.
Ajansa ANF’ê xwe gihand mikurhatinên serçeteyekî DAIŞ’ê ku navê “Reşîd” li xwe kiriye.
Li gorî agahiyên ku hêzên ewlekariya hundirîn hatine girtin, Reşîd berpirsyarê gelek êrişên hovane yên li herêmê ye.
Êrişa 27’ê Tîrmeha 2016’an a li Qamişloyê, ku bi qemyoneke bombebarkirî hatibû kirin û 62 kes şehîd bûbûn, Reşîd yek ji berpirsiyarê êrişê ye.
Serçeteyê DAIŞê yê girtî: Plana êrişa li ser Hesekê li herêmên di bin dagirkeriya Tirkiyê de hate danîn
Serçete Reşîd têkildarî êrişên li ser Hesekê ev agahî da:
“Plana êrişê ya li ser girtîgehê Nîsana 2021’ê kete dewrê. Ji aliyê pratîkî ve min bi xwe êriş bi rê ve dibir.
Ji aliyê Nasir Dînallah ve ku Rêveberê Dîwana Ewlekarî yê DAIŞ’ê yê, ji bo pêkanîna êrişê hatim wezîfedarkirin.”
Serçete Reşîd da zanîn Nasir Dînallah jî li Babê ku di bin dagirkeriya dewleta tirk de ye, dimîne û got,
“Bab ji bo DAIŞ’ê cihê herî ewle ye.”
Serçete bi dewamî li xwe mikur hat ku çeteyên DAIŞ’ê li herêmên ku ji aliyê dewleta Tirk ve hatine dagirkirin li hev civiyane û civînên xwe pêk anîne.
Serçete Reşîd qala hûrguliyên li ser êrişê kir û wiha got:
“Li gorî planê, ji bilî bombevanê xwekuj êriş wê bi 30 kesî bihata kirin.
Ji bo êrişê wesayitên bombebarkirî hatin amadekirin.
Wesayitek wê li Xaçerêya Panorama, wesayiteke din jî wê li pêşiya deriyê bingehîn ê girtîgehê bihata teqandin.”
Serçete Reşîd tîne ziman li gorî planê, êriş diviyabû meha Cotmehê bihata kirin û got:
“Lê belê ji ber tedbîrên tund ên ewlekariyê yên li herêmê nehate kirin û me biryar dan ku meha Mijdarê bikin.
Zexteke giran hebû ku beriya girtî ji bo girtîgeha nû bêne veguhastin divê plan bi cih bê anîn.”
Serçete mikur hat ku piştî êrişê wê çek ji bo çeteyên DAIŞ’ê yên girtî bihata dayin û herêmeke weke Xiwêran Meşva li Hesekê bihata dagirkirin.
Serçeteyê DAIŞ’ê yê girtî: Îstîxbarata Tirk hem êriş hem jî karên DAIŞ’ê yên li herêmê fînanse dikir
Serçeteyê DAIŞ’ê anî ziman saziyên ewlekariyê yên Tirk fînansorî ji hucreyên razayî yên DAIŞ’ê yên li Rêveberiya Xweser re dikin û got, Payebilindên ewlekariyê yên dewleta Tirk hem êriş hem jî karên DAIŞ’ê yên li herêmê fînanse dikirin.”
