Du mehin hêza duyemîn ya herî mezin a cîhanê êrişî Ûkrayna dike. Li rojhilatê Ûkrayna şerek dijwar pêk tê. Rûsya got, wan êrişî 12 navendên leşkerî yên Ûkrayna kiriye. Hikumeta Kîevê jî dibêje, di êrişên qala wan tê kirin de, pitikek di nav de 3 zarok hatine kuştin.
Êrîşên Rûsyayê yên di 24’ê Sibatê de li ser Ûkraynayê dabûn destpêkirin êdî meha xwe ya duyem jî li pey xwe dihêle.
Waliyê Herêma Donetskê Pavlo Kirilenko ragihand ku di êrîşa Rûsyayê de 2 keçên 5 û 14 salî jiyana xwe ji dest dane.
Kirilenko diyar kir ku zarokan di êrîşa li Oçeretînsk de jiyana xwe ji dest dane û bang li sivîlan kir ku heta ji destê wan tê bila ji herêmên şer derkevin û biçin herêmên ewle.
Hat ragihandin ku di êrîşa Rûsyayê ya li ser Odessa de pitikek 3 mehî jî jiyana xwe ji dest daye.
Rêxistinên parastina zarokan bertek nîşanî êrişên Rûsya dan
Rêxistina Alîkariyê ya Save the Children jî bi daxuyaniyekê bertek nîşanî êrişên Rûsya ya li dijî zarokan da.
Rêveberê rêxistinê yê Ûkrayna Pete Walsh got, “Li Ûkraynayê cîhek ewle tune.”
Li gorî agahiyên ji aliyê Save the Children ve hatiye dayîn, ji destpêka şerê Ûkrayna ve nêzî 63 hezar zarok ji dayik bûne.
Rûsya: Me 12 deverên leşkerî kirin armanc
Di daxuyaniya ku ji aliyê Wezareta Parastinê ya Rûsyayê ve hat dayîn de hat ragihandin ku bi şev li Ukraynayê li dijî 12 hedefan êrîş hatine kirin.
Berdevkê Wezareta Parastinê Îgor Konaşenkov diyar kir ku li herêma Dnîpropetvoskê tesîseke ku ji bo hêzên Ûkraynayê fîşek lê dihatin çêkirin hatiye xistin.
Berdevk da zanîn ku li Xarkovê 4 depoyên leşkerî û cihê hevdîtinên leşkeran hatine rûxandin.
Di êrîşan de 150 leşkerên Ûkraynayê hatine kuştin.
Berdevk her wiha da zanîn ku di Cejna Paskalyayê de 423 êrîş hatine kirin.
Ûkrayna: 21,800 leşkerên Rûsya hatine kuştin
Sererkaniya Ûkrayna jî ji aliyê xwe ve ragihand ku heta niha di şerê li dijî Rûsya de, 21 hezar û 800 leşkerên wan hatine kuştin.
Her wiha 179 balafir, 154 helîkopter û 837 tankên Rûsya hatine bêkêrkirin.
Êrişên li dijî kargeha Azovstal a Mariupolê didome
Ûkraynayê ragihand ku êrişên Rûsyayê yên li ser kargeha Azovstal a li Mariupolê dewam dikin.
Hat destnîşankirin ku tesîsên li Mariupolê yên ku sivîl û çekdarên Ûkraynayê lê ne û wek yek ji xalên herî girîng ên ku Rûsya nikare kontrol bike tên dîtin.
Hêzên Rûsya li bakurê Ûkrayna kom dibin
Li gorî agahiyên ku çavkaniyên Ûkraynayê dane, Rûsya leşkerên xwe li herêma sînor a li bakurê Ûkraynayê kom dike.
Serfermandariya Ûkraynayê îdia kir ku li bajarê Belgorodê ku 60 km dûrî sînor e, leşkerên zêde hatine bicihkirin.
Her wiha hate destnîşankirin ku di nava wesayîtên leşkerî û çekên li vir hatine bicihkirin de moşekên bi tîpa Îskender-M hene.
https://youtu.be/OJ7Ro5Moffs
