Koreya Bakur carke din xwe xistiye rojeva cîhanê.
Di merasîma salvegera 90. a damezrandina Hêzên Çekdar ên Koreya Bakur de carke din gefa çekên nukleerî derket pêş.
Lîderê Koreya Bakur Kim Jong-un di merasîmê de axivî û got:
Em ê bernameya xwe ya nukleerî leztir bikin.
Çavkaniyên leşkerî yên Koreya Başûr ragihandin ku merasîm li gorî saeta herêmî saet 22:00’an dest pê kir.
Li gorî ajansa KCNA’yê Kim di merasîma salvegera 90. a damezrandina Hêzên Çekdar ên Koreya Bakur de got:
“Ji bo zêdekirina asta nukleeriya welatê xwe, emê gavan bi avêjin.”
Rêberê Koreya Bakur di axavtina xwe de anî ziman ku çekên nukleerî di esasê xwe de li hember şer rêgir in, lê eger êrîşek li dijî wan pêk were, ew ê van bikar bînin.
Di merasîmê de mûşekên balîstîk ên navparzemînî yên qedexekirî yên Koreya Bakur jî hatin pêşandan.
Pyongyang ji sala 2017’an ve cara yekem di meha Adarê de moşeka balîstîk a navparzemînî ceriband.
Ev ceribandin rastî bertekên naventewî hatibû û DYA biryar da ku rêzek cezayên nû li ser Pyongyang bisepîne.
Li gorî wêneyên ku ji aliyê çapemeniya dewletê ve hatin weşandin, di merasîmê de ji bilî moşekên hîpersonîk, moşekên balîstîk ên ji keştiyên binê deryayê hatin avêtin jî hatin pêşandan.
Ceribandinên moşekên nû yên Pyongyang îsal aloziya li Nîvgirava Koreyê zêde kir.
Wêneyên satelîtê destnîşan dikin ku Koreya Bakur di meha Adarê de li tesîsên ceribandina nukleerî yên li Punggye-ri tevgera xwe zêde kirine.
Vê çalakiyê fikarên ku Koreya Bakur ji nûve ceribandina çekên nukleerî û mûşekên menzîla dirêj dest pê bike, zêde kiriye.
Di merasîmê de mûşekên Hwasong-17 jî hatin nîşandan.
Serokomarê Koreya Başûr Yoon Suk-yeol ku li Koreya Başûr dest bi wezîfeyê kir, li hember çalakiyên leşkerî yên Koreya Bakur helwesteke tund nîşan da.
Ev yek jî di navbera herdu welatan da aloziya heyî zêdetir kir.
Li DYA’yê rêveberiya Biden beriya niha gotibû ew amade ne ku bêyî şert û merc bi Koreya Bakur re dest bi hevdîtinan bikin.
Lê di vî warî de ji Washingtonê tu gav nehat avêtin.
Koreya Bakur berî ku danûstandin despê bikin dixwazin toleyên li ser bên rakirin.
