Şandeyek ji xelkên Şengalê bi Serokkomarê Iraqê Berhem Salih re civiyan.
Di civînê de, Berhem Salih got, pêwîste êşên gelê Şengalê bi dawî bibin û penaber vegerin ser axa xwe. Hevserokê PADÊ Omer Salih jî ku di nava şandeyê de bû, diyar kir ku wan di hevdîtinê de li ser statuya Şengalê û gelek mijarên din niqaş kirine.
Ofîsa Ragihandina Serokkomarê Iraqê daxuyaniyek da û destnîşan kir Berhem Salih bi amadebûna Serokê Parastina Nîştîmanî Hemîd El-Şatirî li koşka Selam a li paytext Bexda’yê pêşwazî li şandeyek ya xelkê Şengalê kir.
Li gorî daxuyaniya Ofîsê Serokkomarê Iraqê Berhem Salih di civînê de wiha gotiye:
“Xelkê Şengalê ji ber tundutijî û terorê gelek êşên mezin kişandine,,
Lê li hember vê jî bi awayekî leheng li ber xwe dane.
Pêwîste êşên xelkê Şengalê bi dawî bibin û rewşa herêmê aram bibe da ku penaber li axa xwe vegerin.”
Di berdewamiya daxuyaniyê de hate diyarkirin ku Serokkomarê Iraqê eşkere kiriye ku divê ji bo çareserkirin û dawîanîna pirsgirêkan, pêngavek ji aliyê Hikumeta Federal û Hikumeta Herêma Kurdistanê ve bê avêtin.
Hevserokê Padê Omer Salih: Di hevdîtinê de statuya Şengalê û gelek mijarên din hatin niqaşkirin
Ji şandeya Şengalê Hevserokê Partiya Azadî û Demokrasiyê ya Êzidiyan-PADÊ Emer Salih, li ser hevdîtina bi Serokkomarê Iraqê Berhem Salih re, ji ajansa Rojnewsê re axivî.
Salih diyar kir ku şandeya Şengalê ji nûnerên hemû pêhateyên Şengalê yên Êzidî, Şîa û Sûnî, ji hemû aliyên siyasî û Rêveberiya Xweser a Şengalê, TAJÊ û PADÊ pêk hat.
Salih anî ziman ku ji bo hevdîtin pêk neyê, PDK’ê gelekî hewl da û diyar kir di civînê de li ser rewşa Şengalê bi giştî nirxandin hatin kirin.
Li gorî Emer Salih, mijara herî girîng a di hevdîtinê de hate nîqaşkirin, avakirina rêveberiyeke nû ya Şengalê bû.
Emer Salih anî ziman, ku ji bo hilbijartina Qeymeqam û rêveberên navçeyê, ji bo 6 mehan dem hatiye diyarkirin.
Hevserokê PADÊ wiha dewam kir,
“Me diyar kir, ku divê pirsgirêkên Şengalê bi diyalogê bên çareserkirin. Her biryarek li ser Şengalê bê dayin, divê bi gelê Şengalê re bê nîqaşkirin. Ji bo hilbijartina qeymeqamê Şengalê jî biryar hate dayin, ku qeymeqam ji aliyê gel ve bi dengdayinê bê hilbijartin.”
Salih da zanîn ku yek ji mijarên girîng ên hevdîtinê jî statuya Asayîşa Êzidîxanê bû û got, “Ji bo çareserkirina mijarê, ku demeke di rojevê de ye bi berfirehî nîqaş hatiye kirin. Ev nîqaş jî di wê çarçoveyê de bû, ku Asayîşa Êzidîxanê li gorî qanûnên Iraqê bibe hêzeke fermî, bi vî rengî bê qebûlkirin.”
