Temenê hikumeta Îsraîlê dirêj nekir.
Mîna dihat texmînkirin koalîsyona avakirina hikumetê nekarî temenê xwe yê deshilatdariyê tejî bike.
Serokwezîr û Wezîrê Karê Derve derketin pêşiya çapemeniyê û gotin:
Dewamkirina hikumetê nepêkane.
Serokwezîr Bennett got;
Me biryarek zehmet da, lê ya ji bo welat pêwist ev bû.
Bi vê yekê re di nava 3 salan de wê Îsraîlî cara 5’emîn herin ser sindoqan.
Hêvî û bendewariyên ji hikumeta koalîsyonê ya Îsraîlê negihişt serî.
Ji roja avakirina koalîsyona hikumeta Îsraîl ku ji gelek partiyan pêk dihat, hêviya domandina wê pir kêm bû.
Ev bendewarî û analîzên dihatin kirin, doh piştrast bû.
Serokwezîrê Îsraîl Naftali Bennett û Wezîrê Karên Derve Yair Lapid ên hikûmeta koalîsyonê li Îsraîlê avakiribûn, têkçûna koalîsyonê ragihandin.
Aliyan di daxuyaniyeke hevpar de ragihandin ku wan li hev kirine ku hefteya bê parlamento were fesihkirin û hilbijartina pêşwext pêk were.
Piştî daxuyaniya hevpar Bennett û Lapid ji gel re axivîn.
Bennett îdia kir ku hikumeta wî karî welat ji krîzeke siyasî ya dirêj a li welat xelas bike.
“Me ji bo rizgarkirina vê hikûmetê di hefteyên borî de çi ji destê me hat, ne ji bo me, ji bo berjewendiya welêt kir. Min gelek hevdîtin kirin û dawiyê zanî ku ger meclis di nava 10 rojan de fesih nebe, ewlehiya Îsraîlê wê zirareke mezin bibîne.”
Lapid: Bennet berpirsiyarî nişan da û wê di rêveberiya welat de bimîne
Lapid ê ku piştî Bennett mafê axaftinê girt, anî ziman ku Bennett berpirsyariyeke mezin nîşan da û spasiya wî kir.
Lapid diyar kir ku Bennett paşeroja Îsraîlê xistiye pêş berjewendiyên xwe û wiha got:
“Hevaltiya me hat ceribandin û li ser vê rêyê em rastî astengiyan hatin, lê me timî ew asteng derbas kirin.
Me nîşan da ku hûn dikarin cuda bifikirin û hîn jî ji bo armanceke hevpar bi hev ra bixebitin.
Ew ji min ciwantire.
Ew rêberekî girîng, nûjen û mêrxas e.
Gumana min tune ku ewê bi salan di serokatiya vî welatî de bimîne.”
Îsraîl piştî hilweşîna koalîsyonê wê carke din biçe hilbijartina pêşwext.
Dema ku qedexeyên qanûnî û betlaneyê li ber çavan bên girtin, tê texmînkirin ku di dawiya meha cotmehê de, li Îsraîlê hilbijartinên pêşwext bên kirin.
Bi biryara hilbijartina pêşwext re Îsraîlî di nava 3 salên dawî de wê cara 5’emîn careke din biçin ser sindoqan.
