Ev 15 sal in gelê Xezayê bi krîzan re rû bi rû ye.
Di encama ambargoya ku Îsraîlê li ser Xezayê ferz kiriye de rewşa bajêr hatiye guhartin.
NY li ser rewşê raporek weşand û banga bidawîkirina ambargoya li Xezayê kir.
Di vê navberê de, Wezîrê Parastinê yê Îsraîlê Gantz beriya serdana Serokê Amerîka Biden, rêziknameya ku statuya qanûnî dide 5 hezar û 500 Filistîniyan erê kir.
Li Xezayê bêtirî 15 salan ve aloziyên jiyanî, mirovî û aborî li dar in.
Li gorî rapora Nivîsgeha Koordîneya Kar û Barên Mirovî li Filistînê ya NY`yê, der dora 1,3 milyon filistînî pêdiviya wan bi alîkariyê heye.
Li herêmê bi giştî nêzî 2,1 mîlyon kes heye.
Ev jî tê wateya ku ji sedî 62 yê şêniyan li Xezayê pêdîviya wan bi alîkariyan heye.
Li gorî rapora NY`yê di cîhanê de rêjeya bêkariyê ya herî bilind li Xezayê ye.
Ji ber qeydên ku desthilata Îsraîlê ferz dike, aboriya Xezayê aloz bûye.
Di encamê de rêjeya bêkariyê û tunebûna ewlehiya xwarinê û xwespartina alîkariyan zêde bûye.
Li gorî raporê, Îsraîl hîna qedexeya li ser ketina kelûpelan a Xezayê ferz dike.
Ji 5 mehên despêka salê ve, jimara kamyonên ku gihiştine Xezayê 8 hezare.
Ev rêje li gorî 2007’an dike ji sedî 30.
Lê tevî vê jî jimara nifûsa li Xezayê ji sedî 50’î zêde bûye.
Li gorî raporê di qada avahîsaziyê de jî, Îsraîlê miqdara madeyên avakirinê yên ku derbasî Xezayê dibin diyar kiriye.
Ev yek pirsgirêkeke bingehîn ji Xezayê re çêdike.
Li gorî raporê, zêdetirî 2 milyon filistînî li Xezayê di nav dorpêçê de ne û nikarin xwe bigihînin herêmên din ên Filistînê yan jî cîhanê.
Ji ber wê nikarin bi şêwaza tê xwestin bên dermankirin.
Derfetên perwerdehî, saziyên perwerdeya bilind jî, jiyaneke normal û bidestxistina kar, li Xezayê peyda nabin.
Zêdetirî ji sedî 31 malbatên li Xezayê, bi zehmetiyên rastîn re rû bi rû ne û nikarin pêwîstiyên bingehîn pên perwerdeyê peyda bikin.
NY`yê di rapora xwe de banga bidawîkirina dorpêçê kir.
Gantz rêziknameya statuya mafê 5,500 Filistîniyan erê kir
Li aliyekî din, beriya serdana Serokê Amerîkayê Joe Biden bo Îsraîlê, Wezîrê Parastinê yê Îsraîlê Benny Gantz gavên ku di çarçoveya pêngavên avakirina baweriyê yên navbera welatê xwe û Rêveberiya Xweser a Filistînê de hatine avêtin, erê kir.
Gantz qebûl kir ku mafê hemwelatîbûna curbecur bide 5 hezar û 500 Filistîniyan.
