Meclisên Lekşerî yên Girê Spî û Reqayê bi daxuyaniyên cuda, gef û êrîşên delweta Tirk ên li ser bakur û rojhilatê sûriyê şermezar kirin û diyar kirin ku ew amade de ne di çarçoveya mafê parastina rewa de, bersiva êrîşan bidin û herêmê biparêzin. Meclisan diyar kirin ku eger dewleta Tirk êrîş bike, ewê bi berxwedaneke dîrokî re rû bi rû bimîne.
Êrîşên dewleta Tirk û gefên pêkanîna dagirkeriyeke nû li dijî bakur û rojhilatê Sûriyê didomin.
Têkildarî mijarê Meclisa Leşkerî ya Girê Spî, daxuyaniyek da.
Daxuyanî ji aliyê Fermandarê Meclisê Riyad El- Xelef ve, li qada meclisê ya li navçeya Eyn Îsayê hat dayîn.
El- Xelef da zanîn ku ew bi hemû hêza xwe amade ne bersiva çi êrişeke li ser herêmê bidin û got:
“Ev amadekarî hemwextî daxuyaniyên dijber ên serokkomarê Tirkiyê Recep Tayyîp Erdogan ên pêkanîna êrişên nû li ser Bakur û Rojhilatê Sûriyê pêk tê. Em di çarçoveya mafê parastina rewa de, bersivê bidin û herêmê xwe biparêzin.”
El- Xelef diyar kir ku dewleta Tirk hewl dide xaka Sûriyê tevlî Tirkiyê bike û zemîneke guncaw ji “terorîstên” li herêmên dagirkirî re biafirîne, ku wan herêman wekî “herêmên ewle” bi nav dike.
Riyad El- Xelef destnîşan kir ku eger dewleta Tirk êrîş bike, ew dê bi berxwedaneke dîrokî ya hêzên parêzvanên vê xakê re, rû bi rû bimîne û dê şer li her derê belav bibe.
Derbarê zêdekirina hêzên hikumeta Şamê li seranserî eniyên şer jî, Riyad El- Xelef anî ziman ku parastina xaka Sûriyê erka hemû Sûriyan e û sekna hêzên hikumeta Şamê li hember gefên dewleta Tirk li gorî Peymana Sochî ya di 22’yê Cotmeha 2019’an de hate îmzekirin, erka wan e û got:
“Wê hêzên me li dijî êrişên dewleta Tirk xaka Sûriyê biparêzin û ji bo rizgarkirina hemû herêmên Sûriyê yên dagirkirî bixebitin.”
“Eger êriş li dijî me pêk hatin, em ê bikin Şerê Gel ê Şoreşgerî”
Meclisa Leşkerî ya Reqayê jî bi heman armancê, daxuyaniyek da.
Daxuyanî ji aliyê endamê fermandariya meclisê Feysel El-Salim ve hat dayîn.
Di dauxyaniyê de êrîşên dewleta Tirk ên li ser herêmê hatin şermezarkirin û wiha hat gotin:
“Eger êrîş li dijî me pêk hat, em ê li ber xwe bidin.
Em ji bo bersivdayîna hemû êrîşan amade ne û hêza xwe ji gelê xwe û mafê xwe yê parastina rewa digrin.
Em li dijî şer in, lê eger êrîş li dijî me pêk hatin, em ê bikin şerê gel ê şoreşgerî.
Dewleta Tirk bi şev û roj hewl dide têkoşîna me ya li hemerî DAIŞ’ê asteng bike û bi bihaneya parastina ewlehiya xwe ya netewî, gefên êrîşê li ser herêmê dixwe.
Bicihbûna hêzên hikûmeta Şamê li eniyên şer di çarçoveya erk û berspirsyariyên wan ên parastina xaka Sûriyê de ye.
Ji ber sekna wan a li kêleka hêzên Sûriya demokratîk di êrîşên dewleta Tirk ên li ser herêmê de, em spasiya gelê xwe û êlên Reqayê dikin.”
