Endama Koordînasyona KJK’ê Besê Erzîncan anî ziman ku şoreşa Rojhilata Navîn wê bi rengê şoreşa jinê pêk were.
Besê Erzîncan bang li jinan û gelên li Îranê hemûyan kir ku yekîtiya xwe xurt bikin.
Endama Koordînasyona KJK’ê Besê Erzîncan derbarê kuştina Jîna Emînî û serhildana gel a piştî vê bûyerê axivî.
Besê Erzîncan anî ziman ku pirsgirêkên li dora jinê rû dane veguherîne pirsgirêkên herî bi krîz û girêka kor û got:
“Heta ku pirsgirêkên jinê çareser nebin, pirsgirêkên din ên civakî jî çareser nabin.
Lewma xeta azadiyê ya jinê û têkoşîna wê bi rola hevgirtina têkoşîna gel û bi rola pêşengiyê radibe.”
Besê Erzîncan behsa xwepêşandanên li Rojhilatê Kurdistanê û Îranê jî kir û ev tişt anî ziman:
”Kuştina Jîna Emînî bû dilopa dawî ya zilm û newekheviya li nava civakê.
Cara yekê ye ku li dora siloganeke jinê; li dora slogana ‘Jin, Jiyan, Azadî’ gel rabûn ser piyan.
Lewma şêwe û naveroka vê serhildana li Îranê destpê kiriye gelekî cuda ye. Radîkal e.
Hemû daxwazên li ser azadî, wekhevî û demokrasiyê li dora slogana ‘Jin, Jiyan, Azadî’ gihîştin hev.
Hêz dan hev û hevpar bûn.
Ev yek veguherîneke gelekî radîkal û daxwaza ji bo afirandina jiyaneke nû ya bêdewlet a li nava civakî nîşan dide.
Ev xwepêşandan bi şênberî radixin pêş çavan ku neteweya demokratîk wê bi pêşengiya jinê bê afirandin.”
Besê Erzîncan bang li jinan kir: Yekîtiya xwe xurt bikin
Besê Erzîncan anî ziman ku divê her kes bi rola xwe rabe û wiha dewam kir:
Di serî de tevgera me ya jinê ya Apoyî, hemû têkoşînên azadiyê yên jinê divê li dijî mejiyê netewe-dewletê hîn bi xurtî bilîzin.
Pêwîste bi pêşengiya jinê, civak ji her alî ve bê pêşvebirin. Dirûşma ‘Jin, Jiyan, Azadî’ bendewariyên bi pêşengiya jinê jî tîne ziman.
Bawerî û pêwîstiyeke mezin a bi pêşengî û xeta azadiya jinê heye. Ev yek jî di nava civakê de bar û berpirsyariyên me jinan girantir dike.
Şoreşa Rojhilata Navîn wê bi rengê şoreşa jinê pêk were.
Dawiya axaftina xwe de Endama Koordînasyona KJK’ê Besê Erzîncan piştgiriya xwe bi jinên Îranê re teqez kir û ev bang kir:
”Em bang li jinan û gelên me yên li Îranê hemûyan dikim ku yekîtiya xwe xurt bikin.
Bi hev re tevbigerin, sîstema xwe ya xweparastin, xwerêveberî û rêxistiniyê biafirînin.
Divê jin û gelê me dest bi avakirina sîstemeke xwerêveberiyê bikin.”
