Rêveberiya Xweseriya Demokratîk a Herêma Cizîrê, destekdayîna projeyên aboriya civakî wekî plansaziya pêşîn a sala 2023’an diyar kir.
Rêveberî bi gel re civiya û gel jî dibêje ev gav gelekî girîng e.
Her wiha Hevserokê Meclisa Rêveberiyê Telat Yûnis jî ji aliyê xwe ve piştrast kir ku ew ê bi hemû derfetên xwe xizmeta gel bikin.
Ji 17’ê Cotmehê ve Rêveberiya Xweser a herêma Cizîrê bi hemû beşên civakê re civiya.
Armanca lidarxistina jî guhdarkirin li daxwaz û pêşniyarên û diyarkirina projeyên sala nû bû.
Xelkê herêmê: Ev civîn gavek baş bû
Welatiyên herêmê derbarê mijarê de axivîn û lidarxistina van civînan bi gavek baş nirxandin.
Telat Yûnis: Em ê bi hemû derfetan xizmeta gel bikin
Hevserokê Meclisa Rêveber a Rêveberiya Xweseriya Demokratîk a Herêma Cizîrê Telat Yûnis jî derbarê mijarê de axivî.
Telat Yûnis anî ziman ku lidarxistina van civînan sîstema Rêveberiya Xweser e da ku plansaziyên salane diyar bike.
Telat Yûnis destnîşan kir ku nêrîn û pêşniyarên ku civînan de derketin, wê bibin bingehê diyarkirina plansaziya sala 2023ʹyan.
Telat Yûnis bal kişand ser encamên civînên ku ji şêniyên kantonên Hesekê û Qamişlo re li dar xistine û ev tişt anî ziman:
“Mijarên sereke yên ku civînê de hatin nîqaşkirin û wekî pirsgirêk hatin destgirtin, pirsgirêka qutkkirina ava Hesekê.
Ev pirsgirêk piştî dewleta Tirk ava qut kir derket, her wiha li herêmên din ên kantona Qamişlo jî heye.
Ji ber wê jî çareserkirina vê pirsgirêkan ji armancên me yên sereke yên 2023’yan in û budceyek ji bo vê yekê hatiye diyarkirin.
Her wiha destekdayîn û pêxistina qada çandiniyê û peydakirina pêwîstiyên cotkaran yek ji daxwazên sereke yên gel e.
Dîsa jî destekdayîna qada tenduristiyê û qada perwerdeyê li gorî îmkan û pêwîstiyên pêşîn di plansaziyê de ne. ”
Telat Yûnis dawiya axaftina xwe de diyar kir ku Rêveberiya Xweser di qonaxa pêşketinê de ye, li gor derfetên heyî xizmeta gel dike.
