Hevseroka Şaxa OHD’a Îzmîrê Şukran Ozturk bang li baroyan kir ku li dijî tecrîda li Îmraliyê bi peywira xwe rabin Desteya Rêveberiyên Xwecihî ya HDP’ê jî diyar kir li Tirkiyê bêyî rakirina tecrîda li Îmraliyê, pirsgirêka kurd jî di nav de tu pirsgirêkên demokrasî û azadiyê nayên çareserkirin.
Ev zêdetirî 20 meh in tu agahî ji Rêber Apo nayê girtin.
Serlêdanên malbat û parêzaran yên ji bo daxwaza hevdîtinê jî nayên qebulkirin.
Li ser vê yekê, parêzeran ji bo ku baroyên bajaran di mijara tecrîdê de bikevin nava liv û tevgerê daxwazname dabûn baroyan.
Hevseroka OHD Şûkran Ozturk: Her kes divê li dijî tecrîdê rabe
Şukran Ozturk, diyar kir ku tu aliyê hiqûqî yê tecrîda li Îmraliyê tune û wiha got: “Dema serlêdaneke hiqûqî hate kirin, erênî yan jî neyînî divê bersivek were dayîn.
Lê ev 20 meh in ev serlêdan bêbersiv tên hiştin.
Divê tecrîd bi dawî bibe û li gorî têgezên hiqûqê tevbigerin.
Divê em vê mijarê weke mijareke ku bûye rojeva welêt binirxînin.
Ji ber ku tekane sedema bicihneanîna hiqûqê, nêzikatiya desthilatdariyê ye.”
Şukran, destnîşan kir ku ji ber vê sedemê dixwazin bangawaziyên xwe bigihînin her kesî û got:
“Di parastina mafên mirova de ji ewil divê baro biaxivin.
Em dixwazin berpirsyartiyên Yekitiya Baroyên Tirkiyê (TTB) û baroyên bajaran bi bîra wan bixin.”
Hevseroka Şaxa OHD’a Îzmîrê Şukran Ozturk dawiyê bang li baroyan kir ku li dijî tecrîdê bikevin nava hewldanan.
“Li Tirkiyê beyî rakirina tecrîdê pirsgirêka Kurd nayê çareserkirin”
Li aliyê din, Desteya Rêveberiyên Xwecihî ya Partiya Demokratîk a Gelan (HDP) bi daxuyaniyekê encamnameya civîna xwe ya di 4’ê kanûnê de li dar xist eşkere kir û tê de tecrîda li Îmraliyê nirxand.
Di encamnameya de hate destnîşan kirin ku li Tirkiyê bêyî rakirina tecrîda li Îmraliyê, pirsgirêka kurd jî di nav de tu pirsgirêkên demokrasî û azadiyê nayên çareserkirin.
Desteya Rêveberiyên Xwecihî ya HDP’ê diyar kir ku ew ê têkoşîna xwe mezintir bikin û polîtikaya tecrîda Îmraliyê bişkînin.
