Di parlantoya Tirkiyê de, zewicandina keça 6 salî bû sedema aloziya navbera mixalefet û rejîma AKP-MHP’ê.
Serokwekîla Koma HDP’ê Beştaş diyar kir ku rejîma deshilatdar erkê xwe pêk neaniye û got:
Berpirsyar deshilat e.
Zewicandina keça damezirînerê Weqfa Hîranûrê ya girêdayî Cemaeta Îsmaîlaga ya 6 salî H.K.G.’ê bi yek ji murîdên cemaetê Kadîr Îsteklî re, bi rojane yek ji rojeva serke ya Tirkiyê ye.
Li meclisê aloziya weqfa hîranûr
Ev yek di di hevdîtinên budçeyê ya li Lijneya Giştî ya Meclisê de veguherî aloziya navbera partiyên siyasî.
Partiyên muxalîf bertek nîşanî gotina Wezîra Xizmetên Malbat û Civakî Derya Yanik dan ku digot;
Ji sala 2020’an ve haya wan ji bûyerê hebû û diyar kirin ku di bûyerê de berpirsyartiya îktîdarê heye.
CHP: Ev du sal in tu kes nehate girtin
Serokwekîlê Koma CHP’ê Engîn Ozkoç diyar kir ku tevî delîl û qeydên deng ên îstîsmarkirina sîstematîk û zewicandina H.K.G.’ê jî îdianame di nava du salan de hatiye amadekirin û wiha got:
“Lê belê têkildarî bûyerê tu kes nehate girtin.
Wezareta Malbatê ev du sal in peywira xwe bicih neaniye.
Gelo êşa çend zarokan heta niha hatiye veşartin?”
AKP’ê heman parastin kir
Serokwekîlê Koma AKP’ê Bulent Turan jî bi bîr xist ku Wezareta Xizmetên Malbat û Civakî ji sala 2020’an ve mudaxilî dozê bûye û li ser parastina mexdûrê parastina xwe kir.
Beştaş: Berpirsyar deshilat e
Têkildarî mijarê Serokwekîla Koma HDP’ê Meral Daniş Beştaş jî got ku bûyera qewimî pirsgirêka herî mezin a Tirkiyeyê ye û ev tişt anî ziman:
“Rojek berê wezîra malbatê li vê derê bû. Heta ku Tîmûr Soykan ev bûyer dernexistibû, haya tu kesî ji îstîsmarkirina zarokeke 6 salî ya di bin navê zewacê de nebû. Lê haya Wezîra Xizmetên Malbat û Civakê jê hebû. Diviya haya AKP’ê jê hebûya. Di halê hazir de ew terîqet, cemaet, ew hevjînê jirêketî, bav, dayik û malbat tên parastin û hewl didin wan bêguneh nîşan bidin. Ango necezakirin heye. Wezîr li xwe mikûr hat ji sala 2020’an ve ji bûyerê haydar in.”
Beştaş herî dawî ev tişt anî ziman:
“Ne wezîra malbatan û ne jî îktîdarê peywira xwe pêk neaniye.
Faîlên bûyerê niha jî li derve bi rehet digerin.
Sedem û berpirsyarê ve jî îktîdara AKP’ê ye.”
